Fenosu, su Ministeru autorizat sa nàschida de s’impiantu mannu: e is sìndigos acutzant sa ferramenta contras de su progetu

Novas Aristanesas, lunis 21 de cabudanni de su 2026

Fenosu, su Ministeru autorizat sa nàschida de s’impiantu mannu: e is sìndigos acutzant sa ferramenta contras de su progetu – 

S’impiantu mannu de regorta e acabidadura energètica prevididu in Fenosu, oramai, est motivu de cunfrontu e de tìrria intra de is istitutziones e is comunidades locales. A pustis de s’autorizatzione arribada dae su Ministeru de s’Ambiente e de sa Seguresa energètica, is sìndigos de Aristanis, Santa Justa e Prammas ant decraradu una lìnia a cumone contras de su progetu “Aristanis”, presentadu dae sa sotziedade Webess Aristanis Srl.

S’autorizatzione ùnica, arribada su 21 de su mese de argiolas a s’acabbu de un’iter de prus de duos annos, pertocat unu Bess (Battery Energy Storage System – Sistema de allogamentu de s’energia a bateria) de 160,745 megawatt. S’impiantu diat dèpere nàschere in una cussòrgia agrìcula de Fenosu, intra de bia de Otieri, Is pastureddas e s’Istatale 131. Su progetu previdit duos campos formados dae 44 baterias mannas, cabinas de cumandu, cavidotos interrados e una sutastatzione elètrica noa, collegada a sa retza natzionale. Is òperas collegadas diant dèpere interessare fintzas Santa Justa e Prammas.

Su Comune de Aristanis e sa Regione Sardigna in s’istrutòria aiant espressadu su parre contràriu, mentovende sa normativa regionale in contu de is cussòrgias adatas a acasagiare custa genia de impiantos. Su Ministeru, però, at cunsideradu custas chèscias oramai propassadas a tenore de sa sentèntzia n. 184 de sa Corte Costitutzionale, chi at apostivigadu s’illegitimidade de unas cantas normas regionales.

Is tres comunes punnant a isboligare una faina cumpartzida. “Semus aprontende un’addòbiu pro istabilèssere una lìnia a cumone e pro istèrrere unu documentu in ue torramus a nàrrere cun firmesa chi custu progetu non nos aggradat”, at naradu su primu tzitadinu de Santa Justa, Antonello Figus.

Su sìndigu de Aristanis Massimiliano Sanna at incarrigadu a is tècnicus e a is abogados de su Comune de agatare àteras maneras pro firmare su progetu de s’impiantu. E su tempus no est meda: difatis, is traballos depent comintzare a intro de dòighi meses dae sa data chi s’autorizatzione non s’at a pòdere prus impugnare in sea peruna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.