Eventos meda in sa coa de chida in provìntzia de Aristanis

Novas Aristanesas, chenàbura 18 de cabudanni de su 2026

Eventos meda in sa coa de chida in provìntzia de Aristanis – Sabores, traditziones, mùsica e isport: in custa coa de chida in provìntzia de Aristanis sos eventos sunt meda.

In Crabas comintzat oe sa de 5 editziones de su Fèstival de sa Butàriga: finas a domìniga in pratza Don Sturzo b’at a àere ispetàculos de coghina, laboratòrios, atopos e assàgios de màndigos, cun mastros coghineris e cun òspites che Mario Tozzi, Franco Brogi Taviani, Moreno Cedroni, Davide Scabin, Gianfranco Pascucci, Chef Hiro, Pasquale Torrente, Marcello Spagnulo, Eva Giovannini e Alessandro Aresu.

In Sabarussa cras e domìniga torrat sa de 44 editziones de Vernaccia e Tradizioni. In pratza de s’Indipendèntzia, sa “Pratza de is Ballus”, sa Pro Loco festat sa cultura, sa memòria e sa viticultura cun sabores, mùsica e traditziones.

Tres dies de festa in Santa Justa pro Santa Severa. Su programma tzivile est comintzadu oe cun assàgios gratùitos de pasta cun cotza e butàriga e cun sa mùsica de Gianfranco Massa; domìniga a sas 10 de mangianu sos ritos religiosos prevident sa mòvida dae crèsia majore de sa protzessione cun sa màgine, acumpangiada dae gente in costùmene e dae launeddas.

In Aristanis sighit su Cabudanni Aristanesu. Custu sero est in programma sa presentatzione de su libru de Franco Meloni in sa biblioteca, sa cunferèntzia de Maria Grazia Rosaria Mele chi faeddat de su portu tzitadinu antigu in s’Hospitalis Sancti Antoni e poi comintzat sa festa de Santu Efis in pratza de su Pòpulu finas a domìniga. Cras, a intro de tzitade b’est sa manifestatzione “Sport e solidarietà” e a sero in Sa Rodia sa festa pro sos 15 annos de Contea e finas su primu torneu de padel in Toràngius, e in ùrtimu in pratza Roma su seranu de sos “Donatori Nati” cun sos Supereroes e sa mongolfiera. Domìniga, in prus de sa regorta de sàmbene cun s’Unidade de Regorta Mòbile de s’Avis, su Tenore de Neoneli serrat sa festa de Santu Efis.

In ùrtimu, finas su mundu de s’ecuitatzione est abbaidende a s’ìsula: in sos impiantos de Tanca Règia in Abbasanta finas a domìniga b’est su Sardigna Jumping Tour.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.