Dae su basket a sa pallavolo, passende peri su tziclismu: Aristanis acasàgiat s’isport de primore

Novas Aristanesas, mèrcuris 30 de cabudanni de su 2026

Dae su basket a sa pallavolo, passende peri su tziclismu: Aristanis acasàgiat s’isport de primore – Dae sa pallavolo internatzionale a su tziclismu, passende peri su basket, sa provìntzia de Aristanis si cunfirmat unu logu capatzu de acasagiare manifestatziones isportivas de primore, cun protagonistas chi arribant dae continente e dae s’èsteru. Is ùrtimos apuntamentos ant allutu is lughes cara a sa provìntzia, furriende impiantos isportivos e paesàgios a palcoscènicos pro s’isport.

A su palasport de Sa Rodia, su Sardigna Volleyball Challenge su 25 e su 26 de cabudanni ddoe at fatu arribare bator formatziones internatzionales: Panathinaikos Atene, Korabelka San Pietroburgo, CSO Voluntari e OK Tent Obrenovac. Intra de custas ddoe fiant 13 giogadoras chi aiant apenas acabbadu is Europeos feminiles, in rapresentàntzia de 8 natzionales, cun calicuna chi at giogadu is partidas prus de importu.

Semper a Sa Rodia, a metade de cabudanni ddoe est torrada fintzas sa Dìnamo Tàtari, impignada contras de sa Valtur Brindisi in su trofeu de basket “Tzitade de Aristanis”. A pustis de bator annos chi mancaiat, sa formatzione tataresa est torrada a sa tzitade de Lionora pro un’apuntamentu chi faghiat parte de su Cabudanni Aristanesu.

A pònnere paris isport e promovimentu de su territòriu ddoe at pensadu sa Sardinia Gravel Race, chi dae 24 a su 27 de cabudanni at traessadu su Campidanu de Terraba, su Monte Arci e su Sinis e, in fines, Turri Manna. Bator tapas e atletas chi arribaiant dae deghe Paisos ant abbiatzadu bias de sartu e paesàgios de costera cun custa isfida agonìstica, una bidriera pro totu su territòriu. Sa manifestatzione, chi est istada sa prima gara gravel a tapas cuncordada in Itàlia, dd’at aparitzada sa Crazy Wheels Cycling Academy e at interessadu unas cantas istruturas de retzimentu e àteros ristorantes locales.

Tres apuntamentos diferentes, tres isport diferentes, ma chi teniant a cumone sa punna de avalorare su logu e de fàghere a connòschere mègius sa provìntzia de Aristanis foras dae is làcanas regionales.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.