Una coa de chida de eventos in provìntzia de Aristanis fatu de traditzione, màndigos bonos e cultura

Novas Aristanesas, giòbia 27 de austu de su 2026

Una coa de chida de eventos in provìntzia de Aristanis fatu de traditzione, màndigos bonos e cultura – Sa provìntzia de Aristanis pro sa fine de austu presentat tantos apuntamentos cun mùsica isperimentale, traditziones gastronòmicas e cultura de su territòriu. Sàbadu 29 e domìniga 30 in manera particulare su calendàriu est prenu de propostas.

In Aristanis sàbadu 29 finit sa de deghennoe editziones de Miniere Sonore, fèstival de mùsica moderna de s’assòtziu Heuristic cun sa diretzione artìstica de Stefano Casta. Su cunventu de s’Hospitalis Sancti Antoni òspitat tres cuntzertos a sero: su duetu eletro-acùsticu Veneer, su progetu multimediale italo-ucrainu Clusters – chi ponet paris clarinete, dantza e tecnologias interativas – e sa produtora sitziliana Nima, chi aunit limba sitziliana, araba e greca in unu Mediterràneu eletrònicu bogadu a doas e torradu a fraigare. Su tema seberadu pro s’editzione 2026 est «Fronteras immaginàrias. Su podere de fraigare mundos e de nde barigare sas làcanas».

In Ollasta apuntamentu sàbadu 29 cun sa segunda die de festa in onore de Santu Innàtziu: protzessione cun sos caddos, banda musicale e cunfradias, sighida dae sa Missa cun prèiga. A su note ispetàculu de su grupu Best 90 e DJ Lucente in Pratza Europa. Domìniga 30 sa serrada cun chena de malloreddus a sa campidanesa e bitella arrustida a 10 èuros peròmine in pratza e cun s’ispetàculu de Etnico Zenias.

Domìniga 30 de austu sa protagonista est Busache cun sa Sagra de Su Succu, anniversàriu nòdidu pro custa manifestatzione dedicada a sa pasta in brou fata in domo, màndigu chi rapresentat sos sabores e s’identidade de unu territòriu chi dae 25 annos festat sa gastronomia locale. No at a mancare s’ammentu istòricu de su coju busachesu.

In ùrtimu, finas a su mese de cabudanni sighint sa de 65 Fieras de s’Artesanadu in Mògoru e sa de 59 editziones de Tessìngiu, mustra-mercadu istòrica de s’artesanadu sardu in Samugheo.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.