Sunt benende cambiamentos pro su fùbalu de sa provìntzia de Aristanis

Novas Aristanes, chenàbura 28 de austu de su 2026

Sunt benende cambiamentos pro su fùbalu de sa provìntzia de Aristanis – Allenadores noos, progetos noos e un’istajone chi paret chi at a èssere prena de novidades: su fùbalu in provìntzia de Aristanis est in su mègius de andare, cun una sèrie de annùntzios chi pertocant iscuadras primas, setores giovaniles e formatzione pro sos àrbitros.

Sa SPD Tharros at comintzadu unu capìtulu nou cun sa presentatzione ufitziale de su diretivu nou. Mauro Porta est su presidente nou, a costàgiu suo su frade Gigi comente vitze-presidente; sa diretzione generale est intregada a Nino Cuccu, e Loris Desogus at a èssere su responsàbile de s’iscuadra prima. Faghent de riserva Bruno Fròngia e Gianluca Pinna pro su campionadu de Promotzione regionale 2026-2027. Sa sotziedade est punnende a un’acordu cun s’Accademy Oristano, iscrita a su Cagliari Calcio, pro tènnere unu setore giovanile chi mancaiat dae tantos annos. Su porta-boghe Riccardo Crovi at faeddadu de su disìgiu de nche torrare su club a su puntu prus artu de su fùbalu regionale sardu.

In Norghiddo, a pustis de s’arretramentu a Tertza Categoria, s’iscuadra torrat a mòvere cun Angelo Puggioni comente tècnicu nou, seberadu – sutalìniat su diretivu de su presidente Federico Mele – cun passione e connoschèntzia.

Su Ghilarza Calcio est festende unu traguardu importante in su setore giovanile: Allievos e Giovanìssimos at a disputare sos campionados regionales in s’istajone imbeniente, lassende cussa provintziale.

In Simaghis est nàschidu su primu progetu de fùbalu feminile Under 15 de sa provìntzia de Aristanis. Su presidente Marco Mottura ispiegat chi s’obietivu est de dare a sas giovaneddas chi giogant a fùbalu un’ambiente totu de fèminas, bidu chi oe a su sòlitu s’agatant in formatziones mistas cun sos pitzocos òmines.

In ùrtimu, in Aristanis sunt abertas sas iscritziones a su cursu gratùitu nou de s’Aia pro sos àrbitros: sete chidas de formatzione pro chie tenet intre sos 14 e sos 40 annos. Incomintzat su 28 de cabudanni in carrera Carducci 9.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.