S’impignu de sos volontàrios de sa provìntzia de Aristanis pro sos animales isbandonados

Novas Aristanesas, martis 11 de austu de su 2026

S’impignu de sos volontàrios de sa provìntzia de Aristanis pro sos animales isbandonados – Intre dificultades e istòrias finidas bene, non si firmat s’impignu de sos volontàrios de sa provìntzia pro amparare sos animales.

Su randagismu in Aristanis sighit a fàghere peleare sos volontàrios. In sas ùrtimas dies ant sarvadu un’àteru gatulinu, ma sos chi si nde sunt ocupende ant fatu un’àteru apellu pro agatare cosa de mandigare adata, letieras, anti-parassitàrios e unu contributu pro sas ispesas veterinàrias.

No est sa prima borta chi sas volontàrias pedint un’interventu prus cuncretu dae su Comune.

Dae chidas pedint a boghe arta unu logu in ue tènnere sos animales, cosa de lis dare a mandigare, critèrios prus elàsticos pro los isterilizare e agiudos pro los curare.

Ma a canta a sas dificultades b’at puru un’istòria chi dat fidùcia. Dae su marràrgiu de Mari Ermi benit in fatis su contu chi finit bene de Mari, una catzedda randàgia diventada giai agreste a pustis de meses de vida lìbera in mesu sas rocas.

Custu lu narat s’educadore de canes Jacopo Fais, chi dae su mese de maju passadu aiat comintzadu cun passènsia a s’acostare a s’animale, andende giai ogni die a nche li leare cosa de mandigare e a lu curare dae sos parassitas, finas a resurtare a lu fàghere acostare faghende·si connòschere cun frùschios e tzinnos chi su cane aiat imparadu a connòschere.

Mari est istada posta in seguresa: como pro issa comintzat su caminu sanitàriu cumpletu, intre vatzinos, test e isterilizatzione, in antis de l’afidare a una famìglia chi l’isetat pro li dare una vida fata de amore.

Fais at naradu però chi su casu de Mari non depet abarrare unu fatu isuladu, ma depet diventare s’ispuntu pro afrontare su problema de sos “canes de niunu”, chi oramai sunt semper prus.

Un’impignu de ispesas e de tempus, at ammentadu, chi non podent afrontare semper e solu sos sìngulos tzitadinos.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.