Sas ratzas de animales istràngios in provìntzia de Aristanis

Novas Aristanesas, chenàbura 21 de austu de su 2026

Sas ratzas de animales istràngios in provìntzia de Aristanis – Finas a sa provìntzia de Aristanis li tocat a parare fronte a sa calada de ratzas de animales istràngios. In sos istagnos, in sos frùmenes, in mare e finas in tzitade, organismos chi benint dae ogni chigione de su mundu ant leadu possessu de sos territòrios, minetzende sos ecuilìbios naturales e s’economia de sos logos.

S’ùrtimu chi ant iscobertu, in su tempus, est su càvuru curridore atlànticu, su Percnon gibbesi, originàriu de s’Atlànticu tropicale e sub-tropicale, signaladu in su mare de su Sinis in su progetu Aliem Vigil, in ue unu de sos protagonistas est su Tzentru Marinu Internatzionale de Turre Manna. Custa presèntzia cunfirmat comente s’abba de su Sinis s’est faghende logu adatu pro organismos tropicales, bidu chi sa temperadura superfitziale de su mare est creschende e in sos ùrtimos istios nch’at sobradu bortas meda sos 30 grados.

In sas lagunas, imbetzes, su chi ponet prus pensamentu est su càvuru biaitu. Pro parare fronte a su problema, in beranu at mòvidu sa pisca controllada de sas fèminas in su situ pilota de S’Ena Arrùbia, cun su progetu Ricrea chi ponet paris Medsea, Legacoop e sos cunsòrtzios de pisca locales.

In frùmenes e rios si signalant su càmbaru pertigatzu e su càmbaru de sa Louisiana, ambos nordamericanos, inseridos in sa listra europea de sas ratzas de importàntzia unionale: faghent dannu a sos àrgines, minetzant sa flora ìtica e càusant minimamentu de sa bio-diversidade locale.

In sos logos ùmidos s’est ispainada sa nùtria, rosigadore semi-acuàticu de dimensiones mannas chi benit dae Sudamèrica. Sa Regione Sardigna at agiornadu in su 2026 su Pranu regionale de controllu e de cuntenimentu, chi balet pro chimbe annos.

In ùrtimu, in sas tzitades est creschende su nùmeru de tzìntzula tigre, s’Aedes albopictus: sa provìntzia de Aristanis est classificada in su livellu bator de arriscu, su prus artu, cun puntas in istiu favoridas dae sas temperaduras artas.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.