Sa provìntzia de Aristanis est semper prus inclusiva
4 Agosto 2026
Novas Aristanesas, martis 04 de austu de su 2026
Foto d'archivio
Novas Aristanesas, martis 04 de austu de su 2026
Sa provìntzia de Aristanis est semper prus inclusiva – Su territòriu diventat semper prus atzessìbile: in provìntzia de Aristanis creschent sos progetos pro nde leare sas barrieras e garantire a totus sa possibilidade de vìvere sas prajas.
In Bosa Marina ant postu passarellas pro passare cun fatzilidade, cadiras JOB pro sa balneatzione assistida, letos pro leare su sole e àteras cosas pro non b’àere barrieras architetònicas. Unu interventu chi s’est pòtzidu fàghere pro more de su progetu promòvidu dae sa Giunta comunale e finantziadu cun unu bandu de sa Regione Sardigna pro sos comunes de sa costa. Sa punna est cussa de cunsentire a tzitadinos e turistas chi tenent dificultades a caminare, de vìvere sa praja istende bene, pro chi su mare siat unu bene de totus.
Fintzas su litorale de Arborea sighit cussu caminu. Pro more de sos contributos regionales destinados a fàghere a manera chi totu potzant gosare de sas prajas e de su mare, su Comune at fatu un’interventu de prus de 60 mìgia èuros chi previdet bator letos pro sas persones cun disabilidade e passarellas pro imbàtere a sa praja. Sas istruturas noas s’agiunghent a cussas de sos annos colados, dende sa possibilidade de agiudare a prus persones. B’at puru servìtzios dedicados a sos pitzinnos.
In Mòdolo ant inauguradu unu parcu de giogos de giai duamìgia metros cuadros, sena barrieras architetònicas e abertu a totu sa Pianalza. B’at giogos progetados pro pitzinnos cun dificultades motòrias, sensoriales e cugnitivas. Unu logu de sotzialidade sena diferèntzias.
In Turre Manna, cun su Sea Scout Beach Resort, imbetzes, b’est puru s’inclusione in su traballu, dende oportunidades a giòvanos cun disabilidade intelletiva-relatzionale. S’istrutura, sena barrieras e cun servìtzios dedicados pro sos bagnos, proponet unu modellu nou de turismu abertu a totus.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.