Dificultades, remèdios e rinnovamentu: novidades pro sa regorta de s’àliga in provìntzia de Aristanis

Novas Aristanesas, lunis 24 de austu de su 2026

Dificultades, remèdios e rinnovamentu: novidades pro sa regorta de s’àliga in provìntzia de Aristanis – Intre dificultades in su servìtziu, apretu pro sa plàstica e una novidade isetada intro de sa fine de s’annu, b’at cosas noas in contu de sa regorta de s’àliga in provìntzia de Aristanis.

In zona de Terraba, sos sìndigos de s’Unione de sos Comunes ant mandadu un’avertimentu ufitziale a su Tzentru de coordinamentu RAEE a pustis de chidas de dificultade in sa regorta de sos dispositivos elètricos e eletrònicos.

In sos tzentros de regorta de Terraba, Marrùbiu, Arcidanu e Uras mancant sas unidades de càrrigu pro sos chi si narant “biancos mannos” tipu sas màchinas sabunadoras e sos furros, e in Marrùbiu, Uras e Arcidanu b’at ritardos finas pro sos eletrodomèsticos piticos.

Su presidente Davide Fanari at pedidu risposta intro de sete dies, ponende in mesu sa Prefetura de Aristanis e s’Assessoradu regionale de Amparu de s’Ambiente, pro fàghere finire s’infadu mannu chi est tochende a sa gente e a sas atividades cummertziales, chi non podent cunsignare custos refudos ispetziales.

In Guilcer in austu est partida s’alerta pro sa plàstica: essende prenos sos depòsitos temporàneos regionales b’at istadu perìgulu chi s’esseret firmada sa regorta diferentziada in sos comunes de s’Unione, e in mesu de custos Abbasanta, Bilartzi e Paulle. Su presidente Salvatore Pes at invitadu sa gente a sighire a fàghere sa cunsigna in sa manera giusta.

In Sèdilo su servìtziu s’est firmadu ma est giai torradu a partire: martis passadu sa gente at pòdidu torrare a cunsignare sa plàstica a s’ìsula ecològica de Matzoneddu e sa regorta dae gianna in gianna at a torrare a comintzare.

In ùrtimu, in antis de finire su 2026 s’at a ativare su bio-digestore anaeròbicu nou de Masangionis, in Arborea. Fatu dae su Cipor cun 13,5 milliones de èuros de finantziamentu, at a tratare prus o mancu 25.000 tonnelladas de refudos orgànicos a s’annu, at a garantire s’autonomia energètica de s’impiantu e at a agiuare a minimare sa Tari in sos comunes de sa provìntzia.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.