Dae sa sanidade a sa cultura, dae sas istruturas a sos agiudos: dinari dae sa Regione a sa provìntzia de Aristanis

Novas Aristanesas, martis 25 de austu de su 2026

Dae sa sanidade a sa cultura, dae sas istruturas a sos agiudos: dinari dae sa Regione a sa provìntzia de Aristanis – Dinari meda dae sa Regione Sardigna a sa provìntzia de Aristanis, cun interventos chi andant dae sas infrastruturas a sa sanidade, dae sa cultura a sa Protetzione Tzivile.

Su fundu prus mannu pertocat sos comunes piticos de periferia: Su Cussìgiu Regionale at aprovadu duos emendamentos de 12,8 milliones propostos dae Orizzonte Comune. Ses milliones ant a andare a comunes cun prus pagu de 5.000 abitantes, classificados comente perifèricos, pro sustènnere s’abertura de ambulatòrios e mantènnere finas a 125 istùdios. Àteros 6,8 milliones ant a finantziare imbetzes istùdios e progetos pro una rete de infrastruturas pro sa mobilidade aèrea lèbia, intre pistas pro elicòteros e logos pro fàghere aterrare o partire aèreos in verticale, cun efetos positivos pro sos servìtzios de emergèntzia.

Pro su chi pertocat s’avaloramentu de su patrimòniu, arribbant 3 milliones pro su recùperu de Tanca Règia, benes pro 530 ètaros intre Abbasanta e Paulle gestidos dae s’ASVI Sardigna. Su dinari at a serbire pro fàghere unu pranu de fatibilidade pro acontzare domos istòricas de su Dominàriu – chi sunt de su de XV sèculos – e pro funtziones turìsticas e ecuestres noas.
Sos ùrtimos interventos sunt de sos annos Otanta.

700 mìgia èuros andant a sa Fundatzione Casa Museo Antonio Gramsci de Bilartzi pro unu tzentru de istùdios in s’ex mercadu tzìvicu de corso Umberto I: 400 metros cuadros cun sala cunferèntzias, biblioteca, archìviu e laboratòrios.

In su programma “Le Porte della Sardegna”, Aristanis e Santa Justa retzint 1,33 milliones – 667 mìgia onniunu – pro megiorare sos logos pro intrare a su portu industriale, in unu pranu de 12 milliones chi pertocat deghe comunes sardos.

Pro sos dannos causados dae su tempus malu intre su 2022 e su 2025, sa Giunta at istantziadu prus de unu millione pro dòighi interventos: a sa provìntzia de Aristanis andant 60.645 èuros a Sèdilo e 12.820 èuros a Arcidanu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.