Cras est Mesaustu: sas orìgines de sa festa prus isetada de istiu

Novas Aristanesas, chenàbura 14 de austu de su 2026

Cras est Mesaustu: sas orìgines de sa festa prus isetada de istiu – Finas sa provìntzia de Aristanis cras festas su Mesaustu cun essidas a mare o a campagna, vìsitas a museos e sitos archeològicos o pràngios in cumpangia.

Ma cantas bortas, aprontende un’arrustu o bagnende in sos mares aristanesos, nos amus preguntadu dae in ue benit custa festa tantu apretziada de su calendàriu italianu? Sas orìgines sunt antigas meda, e tenent sas raighinas in sa Roma antiga.

Su nùmene benit dae su latinu feriae Augusti, est a nàrrere “pasu de Augustu”: est istadu s’imperadore Otavianu Augustu, difatis, chi at istituidu custa festa in su 18 a.C., dedichende·la a Conso, deus de sa terra e de sa fertilidade, pro festare s’incùngia e marcare sa fine de sos traballos
in campagna.

Fiat unu momentu isetadu meda dae sa gente: sos massajos retziant istrinas dae sos propietàrios de sa terra, si faghiant cursas de caddos e si mudaiat su logu cun frores; sas festas comintzaiant sa prima die de austu e imbatiant finas a su 15 de su mese. Unu tempus de pasu meritadu pro totus,
reconnotu dae s’Istadu.

In su de VII sèculos sa Crèsia catòlica at fatu sua sa data, trasformende·la in una festa religiosa dedicada a s’Assuntzione de Maria Vìrgine: a su chi narat sa traditzione, cussa die Nostra Segnora est istada retzida in Chelu in ànima e corpus. Dae cussu momentu, paris cun sas gitas a campagna e
cun sos fogos artifitziales in sas prajas, su 15 de austu si faghent finas protzessiones e funtziones religiosas chi ancora oe ànimant sas biddas e sas tzitades de totu Itàlia.

Una festa chi no est abarrada in Itàlia ebbia. In Ispagna, paisu chi tenet traditzione catòlica forte meda, su Mesaustu si festat cun protzessiones marianas solennes. In Irlanda est traditzione de bagnare in mare su 15 de austu pro tènnere salude e fortuna totu s’annu. A Nostra Signora Assunta
la festant finas in Cànada e in paritzos paisos de Amèrica de Sud comente sa Costa Rica, sa Colòmbia e su Cile. Pro cras, duncas, bona festa de Mesaustu a totu sos chi nos sunt leghende!

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.