B’at ancora carchi die pro andare a bìere sas fieras de s’artesanadu de Mògoru e de Samugheo

Novas Aristanesas, sàbadu 29 de austu de su 2026

B’at ancora carchi die pro andare a bìere sas fieras de s’artesanadu de Mògoru e de Samugheo – Bi mancant prus o mancu duas chidas pro serrare sas duas mustras mannas de s’artesanadu artìsticu in provìntzia de Aristanis: ambas ant a serrare su 13 de cabudanni, e b’at ancora pagas dies pro andare a las bìere.

In Mògoru su tzentru fierìsticu òspitat sa de 65 editziones de sa Fiera de s’Artesanadu Artìsticu de Sardigna, aberta onni die dae sas 10 de mangianu a sas 9 de sero (h 21). Sunt protagonistas 113 artesanos chi benint dae totu s’ìsula e chi rapresentant trèighi setores: tzeràmica, tessìngiu, oreria, linna, bidru, metallu, pedde, resòrgias, ricamu, traballos de intritzu, pedra e produtziones agro-alimentares. S’editzione de su 2026, intitulada “Intrecci” e curada dae Violetta Scanu, nche bàrigat sa divisione sòlita in categorias e fràigat relatziones noas intre òperas, materiales e limbàgios de espressione. Un’istrutura manna apicada a filos de lana est su coro visivu de sa mustra. Su sìndigu de Mògoru Luca Orrù ammentat comente sa Fiera dae prus de sessanta annos est unu riferimentu culturale reconnotu in totu sa Sardigna. Su billete intreu costat 4 èuros, cussu a prètziu agevoladu 2 èuros; si podent agatare finas billetes turìsticos abbinados cun sos sitos museales de Parte Montis, chi movent dae su prètziu de 6 èuros e chimbanta.

In Samugheo, in sa cantina sotziale betza in carrera Brigata Tàtari 53, b’est sa de 59 editziones de Tessìngiu, aberta onni die dae sas 10 de mangianu a sa una e mesa (h 10,00-13,30) e dae sas 3 e mesa a sas 8 de sero (h 15,30-20,00). Sa mustra ponet paris prus de 40 artesanos dae totu sa Sardigna e proponet “Dialoghi”, unu cunfrontu intre sos mastros de su tessìngiu sardu e gràficos comente Giulio Iacchetti e Lorenzo Damiani. Su diretore artìsticu Gianni Filindeu sutalìniat chi su cunfrontu intre sabidorias diferentes faghet nàschere itineràrios creativos in su setore produtivu de s’ìsula. Su billete intreu costat 6 èuros, cussu a prètziu agevoladu 4 èuros; sos residentes in Samugheo e in Àllai non pagant nudda e mancu sos pitzinnos finas a sos 12 annos.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.