Unu programma ricu de eventos in sa coa de chida in zona de Aristanis

Novas Aristanesas, chenàbura 3 de trìulas de su 2026

Unu programma ricu de eventos in sa coa de chida in zona de Aristanis – Mùsica, tzìnema, ispetàculos e traditziones in sa prima coa de chida de trìulas in provìntzia de Aristanis.

In su capoluogu comintzat “Luci d’Estate 2026”, su programma promòvidu dae su Comune pro animare su tzentru istòricu e Turre Manna. Si comintzat custu sero in pratza Manno cun “Viva Mexico” chi at a sighire finas sàbadu e domìniga. Cras sero, imbetzes, pratza Duomo at a ospitare sa cumèdia in sardu “Tempos Modernos” de sa cumpangia Ammentos e Bisos, e in su Campu Seminàriu Artzi-vescovile at a finire sa Catte Cup Next Gen. In ùrtimu, dae domìniga in su tzentru federale “Tino Carta” de Sa Rodia at a comintzare Conti Summer Camp 2026.

Dae oe comintzat finas “Il Giardino del Centro” de su Tzentru de Servìtzios culturales Unla: si comintzat cun su film de animatzione Manodopera de Alain Ughetto. Semper custu sero comintzat finas “Racconti d’estate”, su tzìnema suta sos isteddos a incuru de Pro loco e Comune in su giardinu de su Museu Diotzesanu Arborense.

In Crabas finas a domìniga b’est su Sardegna Archeofilm Festival: custu sero b’at a èssere su film “Sui tetti di chi dorme”, cras unu seranu dedicadu a sas Domus de Janas e domìniga su sero conclusivu cun “Il viaggio dei Giganti” dedicadu a Mont’e Prama. Semper dae oe, in Santu Giuanne de Sinis comintzat sa rassigna “Notti d’estate”, chi ogni chenàbura at a acumpangiare sa gente cun su cursu de ballu sardu abertu a totus “Baddendi Tottus Imparis”.

In Marrùbiu est in su mègius de andare su programma de “E…state a Marrubiu”: custu sero torrat su seranu de ballos de s’Auser e cras pratza Roma at a ospitare su cuntzertu finale de su cursu de perfetzionamentu de violinu, trumba e corru de s’Iscola tzìvica de mùsica “A. Saba”, e finas sas finales de su torneu de pallavolo de ispiàgia.

In ùrtimu, in Bosa oe comintzat “Tramonti al Castello”, cun unu seranu dedicadu a s’istòria de sos Malaspina e de su Casteddu de Serravalle cun su cuntzertu de s’Ambra Pintore Quartetto.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.