Una coa de chida de eventos in provìntzia de Aristanis

Novas Aristanesas, chenàbura 17 de trìulas de su 2026

Una coa de chida de eventos in provìntzia de Aristanis – Cultura, festas e ispetàculos in sa coa de chida in provìntzia de Aristanis.

In Crabas sighint sos eventos de s’Istiu Crabarissu: domìniga in pratza Lionora b’est sa rassigna literària in ue est òspite Antonio Boggio e su romanzu suo “Nero Mediterraneo”, a pustis pro “I Giganti di Cabras” su cuntzertu de The Sisters.

Sighint sos eventos Luci d’Estate 2026 intre su tzentru istòricu de Aristanis e Turre Manna. Cras sero, in sa Pinacoteca Carlo Contini aberit Secret Pages, sa mustra de Nobuyoshi Araki a incuru de Sonia Borsato pro sa de 28 editziones de su Dromos Festival. Sunt espostas 122 òperas fotogràficas de sa Culletzione Molinas Balata.

Semper in tzitade, custu sero pro sa de 16 editziones de “Il Giardino del Centro – Memorie” de su Tzentru de Servìtzios Culturales, su dibàtidu in contu de Memòrias, istòria e territòriu: unu patrimòniu cumpartzidu cun Silvia Bencini e Luca Bravi de s’Universidade de Firenze e cun sas classes interessadas in su progetu. E poi ancora custu sero tzìnema suta sos isteddos cun “Racconti d’estate” in su Giardinu de su Museu Diotzesanu, e sa projetzione de su film “Campioni”.

In Marmidda Arta comintzat Albagiara Teatro, sa rassigna noa nàschida a intro de su Sardigna Teatro Festival a incuru de sa cumpangia I Barbariciridicoli: cras sero in pratza Mercadu in Ollasta si rapresentat Said de sa cumpangia La Forgia de Murera. Est una cumèdia musicale in limba sarda, variante campidanesa, chi tocat temas universales comente s’amigàntzia, s’amore, s’onore, su rispetu, su atzetare sos àteros e su chircare un’apartenèntzia in una terra istràngia.

In ùrtimu, in Norghiddo si finint de festare sos Santos Giulita e Chìrigu, intre fide, traditzione e ispetàculu chi ant animadu sa pratza de su Pòpulu. Custu sero si rapresentat sa cumèdia teatrale “El Pueblo Unido” de sa cumpangia “Note di Teatro” cun regia de Paolo Floris, poi pro serrare su dj set de Dj Lik.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.