Su màssimu de sos votos e sa lode pro sos diplomados a nou de sas iscolas superiores de sa provìntzia de Aristanis

Novas Aristanesas, martis 21 de trìulas de su 2026

Su màssimu de sos votos e sa lode pro sos diplomados a nou de sas iscolas superiores de sa provìntzia de Aristanis – Est unu bilàntziu positivu meda cussu chi benit dae sas iscolas superiores de sa provìntzia de Aristanis a s’acabu de sos esames de maturidade. In s’Istitutu tècnicu industriale “Othoca” deghe diplomados ant leadu su màssimu de sos votos: sete ant otentu 100/100 e tres fintzas sa lode. Sos resurtados ant interessadu iscolas diversas, dae s’eletrotècnica a s’informàtica finas a su litzeu iscientìficu sèberu iscièntzias aplicadas.

Resurtados de importu fintzas pro s’Istitutu superiore “De Castro – Contini”, chi at serradu s’annu cun batòrdighi istudiantes diplomados cun 100 e ses cun sa lode. Sas etzellèntzias pertocant su litzeu clàssicu, su litzeu artìsticu e sa sede de Terraba, indirìtziu Gràfica. A custos si agiunghent àteros duos reconnoschimentos cun lode imbàtidos dae sa setzione de sa presone de Màssama de su litzeu artìsticu.

Soddisfatzione manna fintzas in su litzeu “Benedetto Croce”, in ue 17 istudiantes ant ledu su puntègiu prus artu, cun duas lodes. Unu resurtadu chi at interessadu sos indirìtzios de Scienze Umane e su Linguìsticu Esabac, percursu chi permitit de otènnere paris su diploma italianu e su Baccalauréat frantzesu. Pròpiu in s’àmbitu Esabac bator istudiantes ant otentu su màssimu de sos votos.

Nùmeros de importu fintzas in su “Mariano IV d’Arborea”, cun vinti diplomados chi nde sunt essidos cun 100/100 e carchi lode, siat in sa sede de Aristanis e siat in cussa de Bilartzi, interessende sos indirìtzios de su litzeu iscientìficu, de s’iscientìficu bio-mèdicu e de su litzeu linguìsticu.

Novas bonas, in fines, dae s’Istitutu “Don Deodato Meloni”, in ue tres istudiantes ant finidu cun su màssimu de sos votos e una pitzoca at leadu fintzas sa lode. Unu resurtadu chi s’inserit in un’annu iscolàsticu chi at bidu, in totu, chentu istudiantes diplomados in sos percursos de s’istitutu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.