Su degòlliu de su terremotu de su Venetzuela pertocat sa provìntzia de Aristanis puru

Novas Aristanesas, mèrcuris 8 de trìulas de su 2026

Su degòlliu de su terremotu de su Venetzuela pertocat sa provìntzia de Aristanis puru – Su terremotu destruidore chi at interessadu su Venetzuela in is dies passadas at incarreradu una cadena de bonucoro chi pertocat fintzas sa provìntzia de Aristanis.

S’artzidiòtzesi de Aristanis e cussa de Abas e Terraba ant rispostu a s’apellu de sa CEI e de su Paba cun unu primu finantziamentu de 5.000 èuros e cun su cuncordu de una die de pregadoria istabilèssida pro domìnigu 12 de trìulas, una faina ghiada dae munsennore Roberto Carboni. In totu is parròchias, in prus, ant a cuncordare una regorta istraordinària in favore de sa Caritas.

Su sisma, cun epitzentru in sa cussòrgia de La Guaira e chi s’est ispartu fintzas a sa cussòrgia de Naiguatà, at fatu mìgias e mìgias mortos, destruende biddas e tzitades, in unu Paisu giai piessignadu dae una crisi umanitària mala. Is sucursos agatant barrancos mannos, pro more de sa firmada de is servìtzios de base chi non permitint de arribare a cussòrgias mannas chi sunt ancoras isuladas.

E semper dae sa provìntzia de Aristanis lompet fintzas su contu de Lilly – Lilibeth Del Carmen Perez Briceño – abogada venetzuelana de 49 annos, òspite in Iscanu. Arribada duas chidas a oe pro bisitare a sa fìgia e a su nebodeddu, at iscobertu chi domo sua chi s’agatat in “Camuri Park”, in Naiguatà, nde dd’at isderrocada su terremotu. In s’isciusciu de custu palàtziu de sete pranos ddoe ant pèrdidu sa vida agiomai totus is bividores.

Su fìgiu, chi s’est sarvadu pro miràculu pro ite ca a s’ora de sa trèmida de sa terra non fiat in domo, immoe dormit in màchina, pro ite ca non ddoe at logos de acasàgiu. In s’interis, in Venetzuela si connoschent ancoras cunditziones drammàticas: cussòrgias mannas sena de currente elètrica e sena de abba, barrancos in is sucursos, pagu mezos e ritardos in sa gestione de is agiudos. Sa famìllia, intra de Sardigna e Venetzuela, contat de una situatzione de suferèntzia manna e de pagu seguresa.

In s’interis, sa comunidade de sa provìntzia de Aristanis s’afatèriat pro agiudare a Lilly, chi at pèrdidu totu e, pro cussu, giai s’amegat de pensare a una faina de bonucoro pro issa e pro sa famìllia sua.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.