Sos eventos de sa coa de chida in provìntzia de Aristanis

Novas Aristanesas, chenàbura 31 de trìulas de su 2026

Una coa de chida prena de apuntamentos in provìntzia de Aristanis

In Mragaxori sa mùsica, paris cun sos sabores de sa traditzione, at a èssere protagonista de “Monte Arci in Festa”. Sa manifestatzione comintzat cras cun sa de 30 editziones de sa Sagra de sas Lorighitas, dedicada a sa pasta tìpica de sa bidda. Intre sos apuntamentos prus isetados bi sunt sos cuntzertos de Benji e Fede, protagonistas de su primu seranu, e de sos Matia Bazar, chi serrant sa manifestatzione.

Semper cras, torrat a Narabuia sa rassigna “Saboris Antigus” pro connòschere sos sabores de sa coghina traditzionale. S’ant a fàghere sos màndigos de sa memòria, cussos passados dae una generatzione a s’àtera, cun unu percursu gastronòmicu chi ogni annu proponet màndigos noos. S’apuntamentu est in carrera Su Cunzau de is Paras, a curtzu a su parcu de sos Nuragheddos.

In Aristanis su tzentru istòricu si bestit de colores internatzionales cun sa de chimbe editziones de su Fèstival Internatzionale de su Floklore “Tzitade de Aristanis”, prevìdidu pro domìniga e lunis sero in pratza Lionora. A su palcu b’ant a pigare grupos chi benint dae Lituània, Costa Rica e Sèrbia, paris cun grupos sardos. Sighit finas su calendàriu de “Luci d’Estate 2026”. Domìniga sero in pratza de crèsia majore b’at a èssere su cuntzertu de Cory Henry & The Funk Apostles per Dromos Festival.

Custu sero, tzìnema suta sos isteddos in su litorale de su Sea Scout Beach Resort in Turre Manna cun sa projetzione de su documentàriu “La Casa di Power of Sport”, e in s’Unla de Aristanis su film “Lumina” serrat sa rassigna de istiu “Il Giardino del Centro”.

Isetu mannu finas pro sos eventos de sa rassigna “I Giganti dell’Arte” de sa Fundatzione Mont’e Prama. Cras sero s’àrea archeològica de Tharros òspitat su cuntzertu de Riccardo Cocciante e domìniga at a tocare a su grupu I Nomadi. In ùrtimu, in su tzentru istòricu de Crabas custu sero, cras e domìniga eventos literàrios e musicales meda cun “L’estate cabrarese”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.