Sos coros de sa provìntzia de Aristanis

Novas Aristanesas, chenàbura 10 de trìulas de su 2026

Sos coros de sa provìntzia de Aristanis – Sa provìntzia de Aristanis est unu laboratòriu biu de coralidade, in ue sa traditzione musicale sarda s’acostat finas a palcos internatzionales e a retzas culturales europeas. Tres coros l’ant mustradu: Ars Antiqua de Sèneghe, Santa Usanna de Busache e Sa Pintadera de Aristanis.

Su coro Ars Antiqua de Sèneghe at a èssere protagonista in Cracòvia de unu progetu de iscàmbiu internatzionale cun duos cuntzertos cras e domìniga. S’initziativa previdet unu “cuntzertu-contu” dedicadu a sa Sardigna e un’esibitzione paris cun su coro locale Chór w Kontakcie. Unu percursu intre mùsica e narratzione identitària, abbaidende giai a su 2027, cando at a èssere su coro polacu a torrare sa vìsita.

Dae Busache benit sa testimoniàntzia de su coro Santa Usanna, chi in su mese de martzu coladu est istadu impignadu in un’iscàmbiu culturale apassionadu cun su coro A.N.A. de Preganziol. Su biàgiu a Vèneto at bidu cuntzertos partetzipados e momentos emotzionantes meda, cun s’esecutzione de branos de sa traditzione busachesa comente “A sa mod’e Busache”. Est istada importante in manera particulare sa prima esibitzione de chimbe coristas giovaneddos, signale de unu ricàmbiu generatzionale chi andat paris cun sa continuidade de unu repertòriu arraighinadu in sa memòria de totus. Su grupu, ativu dae su 1998 e dirìgidu dae su mastru Gianni Puddu, sighit unu percursu de abertura chi nche l’at a leare dae inoghe a pagu tempus a Abruzzo, a L’Aquila Capitale de sa Cultura 2026.

In Aristanis, in ùrtimu, su coro feminile Sa Pintadera est unu de sos puntos de riferimentu de sa coralidade isulana. Dirìgidu dae su mastru Giovanni Andrea Puddu, su grupu est protagonista de paritzas rassignas, comente “Donne in… Canto”, e de trasferimentos natzionales e internatzionales importantes, dae Badde de Aosta a Parigi. Su grupu aunit s’atividade artìstica a sa promotzione culturale de sa traditzione populare sarda, e a palas bi tenet s’istrutura assotziativa ghiada dae s’Acadèmia de Traditziones Populares.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.