Sa rena furada in Is Arutas torrat a domo
14 Luglio 2026
Novas Aristanesas, martis 14 de trìulas de su 2026
Is Aruttas
Novas Aristanesas, martis 14 de trìulas de su 2026
Sa rena furada in Is Arutas torrat a domo – In antis s’ammentu de una vacantza, a pustis sa cussèntzia de nch’àere furadu unu cantigheddu de unu logu pretziosu. A pustis de giai chimbanta annos sos granigheddos de cuartzu sunt torrados a Is Arutas: los at torrados Silvia Ferrari chi, paris cun su maridu Eros Cattaneo, at cunsignadu a su Comune de Crabas giai 40 chilos de rena furada in sos annos Setanta.
Tando Silvia teniat prus o mancu 15 annos e, in una vacantza in roulotte cun sos genitores, aiat iscobertu sa bellesa de su Sinis. Comente capitaiat in cussos annos, sa famìllia aiat regortu cussa rena comente “souvenir”. Pro annos meda cussos granigheddos sunt abarrados in su giardinu zen de sa mama Valeria, finas a cando sa fèmina at cumpresu chi cussu gestu, si l’aiant fatu mìgias de bisitadores, aiat pòtidu arruinare un’ambiente ùnicu.
In antis de mòrrere, Valeria aiat espressadu unu disìgiu: de nche torrare cussa rena a logu suo. Silvia l’at fatu, torrende·nche sos granigheddos finas a Is Arutas, cun s’agiudu de s’Àrea Marina Proteta.
Su contu de Silvia s’agiunghet a cussos de bisitadores meda chi in sos ùrtimos annos ant detzisu de nche torrare sa rena furada in sos annos passados. In su 2021 fiat torrada a Crabas cussa regorta baranta annos in antis dae Fabiana Di Centa, chi cando fiat pitzinna nde l’aiat leada in una vacantza cun sa famìllia. Bènnida dae Roma, paris cun su fìgiu, nde l’aiat torrada. Semper in su 2021 nde fiant torrados fintzas unos cantos pacos mandados dae èstero, unu dae Amèrica dae unu bisitadore chi aiat connotu Is Arutas in sos annos Setanta.
Gasi comente in su 2020 nde sunt torrados 200 chilos de rena, intre cussa recuperada in sos controllos e cussa mandada dae chie cheriat rimediare. In fines, s’annu passadu nch’ant torradu àteros 150 chilos de rena in sa Die ecològica de su Sinis.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.