Sa provìntzia de Aristanis festat a Santu Antine Imperadore

Novas Aristanesas, martis 07 de trìulas de su 2026

Sa provìntzia de Aristanis festat a Santu Antine Imperadore – Sa provìntzia de Aristanis est in su grofu de sa festa dedicada a Santu Antine Imperadore, chi in custas dies si festat in carchi bidda de su territòriu intre ritos religiosos, traditziones e momentos de festa.

A pustis de sa die de eris de interessu mannu cun s’Àrdia de Sèdilo, sa cursa ispantosa a caddu chi rapresentat su coro de sa devotzione a Santu Antine, oe puru sa bidda est su tzentru de sa festa. Sa die est comintzada chitzo cun sas missas in su santuàriu e in parròchia, a pustis sa cunsigna de sas pandelas e sa segunda Àrdia a caddu, acumpangiada dae sos fusileris e dae sa banda musicale. A merie b’ant a èssere sos bespros solennes e sa protzessione in sa bidda, a sero in pratza Pasquale Cocco b’at a èssere “Sèdilo in Festa”, apuntamentu cun mùsica, grupos folk e ispetàculos cun artistas e costùmenes traditzionales dae totu sa Sardigna.

Atentu mannu puru a sos prus giòvanos cun “S’Àrdia de sos pitzinnos”, s’ammentu dedicadu a sos piticos chi, cun cadditos de canna, ant fatu a manera simbòlica su matessi ritu de sos mannos in su santuàriu. Un’initziativa chi aunit giogu e traditzione e tramandat sa devotzione a sos prus giòvanos.

In Ollasta, imbetzes, sa festa sighit finas a cras cun missas e intratenimentu. Su programma, comintzadu su 28 de làmpadas passadu, cun novenas e missas solennes, s’alternat a sa festa tzivile in Pratza Europa cun seradas musicales, grupos folk e ispetàculos organizados dae su comitadu Leva 1986.

Sa festa de Santu Antine in provìntzia de Aristanis interessat un’àtera bidda puru: Siamajore, in ue sa festa de Santu Antine Magnu s’est fata su 23 de abrile passadu, dende su via a manera simbòlica a su tziclu de sas ricurrèntzias in Sardigna intre ritos religiosos e traditziones populares chi, intre beranu e istiu, sighint a afortigare s’unione intre comunidades e identidades locales.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.