Dae sos tramontos in su casteddu a sas mustras in Casa Deriu: Bosa bivet un’istiu de cultura

Novas Aristanesas, martis 28 de trìulas de su 2026

Dae sos tramontos in su casteddu a sas mustras in Casa Deriu: Bosa bivet un’istiu de cultura – Bosa, sa tzitade de su Temo, est bivende un’istiu intre cultura, arte e avaloramentu de su patrimòniu suo, cun eventos meda chi interessant residentes e bisitadores.

Sa programmatzione de s’istiu est afidada a sa Fundatzione Bosa, chi at comintzadu un’istasione noa de atividades cun sa punna de mudare sos logos sìmbulu de sa tzitade in logos bios de partetzipatzione. Intre sos atòbios b’est “Tramonti al Castello”, sa rassigna chi si faghet in su casteddu de Serravalle, chi finas a su mese de cabudanni at a propònnere atòbios dedicados a s’archeologia, a s’istòria, a s’arte, a sa literadura e a sa mùsica.

Chenàbura sero, pro esempru, b’at a èssere Christian Greco, diretore de su Museu Egìtziu de Torinu e unu de sos egitòlogos prus de importu a livellu internatzionale, protagonista de s’atòbiu “L’Anima Egizia e i Riti Ultraterreni”. Su seranu at a èssere impretziosidu dae sas mùsicas de su Clarsech Ensemble, cun s’assòtziu InterArtes.

Semper in su casteddu Serravalle b’at a èssere sa rassigna “Noi Alberi”, ideada dae s’assòtziu Sesto Continente e in programma finas a su 5 de austu. Tzìnema, mùsica, arte cuntemporànea, poesia, laboratòrios e esibitziones ant a animare pro deghe dies unu de sos logos prus bellos de sa tzitade cun eventos fintzas in su tzentru istòricu.

In su Museu Casa Deriu, imbetzes, finas a su mese de santugaine, b’at a àere bator mustras dedicadas a limbàgios artìsticos diferentes. A pustis de “Dialoghi d’Ombra” de Salvatore Coradduzza, chi si podet bisitare fintzas a su 3 de austu, b’ant a èssere “Forma Essenza. S’arte tzeràmica de sas famìllias Mola e Usai”, sa mustra fotogràfica “Faccia da Bosa – The Look of Bosa” de Martin Wolff e “Il colore dei sogni” de Antonio Chessa.

S’istiu bosincu pensat puru a s’amparu de sa memòria istòrica cun s’abertura istraordinària, sas dies passadas, de su cantieri de restàuru de su relògiu monumentale de su 1874 in sa Crèsia de su Rosàriu, chi in intro de su mese de cabudanni at a èssere torra operativu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.