Una coa de chida de eventos in provìntzia de Aristanis

Novas Aristanesas, chenàbura 5 de làmpadas de su 2026

Una coa de chida de eventos in provìntzia de Aristanis – Eventos meda in sa coa de chida in provìntzia de Aristanis.

In Nurachi serrat CantinArte: sàbadu sero in s’Òasi Naturale de Pischeredda b’est “CantinArte in Laguna, Tramonto in musica”, unu sero de màndigos e binu a ora de s’intrinada, cun sa mùsica de Pierpaolo Vacca e sos Nuhara Trio, in antis de su dj set “Antropocene” de Francesco Zappalà.

Fora s’arga dae sa costa: custu mangianu si firmat in Arborea s’initziativa natzionale “Pulifondali e pulispiagge” de Fipsas – Federazione italiana pesca sportiva, attività subacquee e nuoto pinnato.

Unu pensamentu in contu de giustìtzia, memòria e chirca de veridade: cras sero in sa sala de cunferèntzias comunale de pratza Zucca in Biddobrana, su magistradu e procuradore agiuntu betzu de Palermo Antonio Ingroia presentat su libru suo “Traditi – Le mie verità sui misteri di Palermo e sulla magistratura”, pro su Fèstival de sa Filosofia “Trigu”.

Una festa pro famìllias, pitzinnos e isportivos caraterizada dae su pluralismu cun mùsica in presèntzia, giogos gonfiàbiles, animadores de istrada e màndigos bonos. Sàbadu a merie sa pratza de su palasport nou de Sa Rodia, in Aristanis, at a ospitare sa prima editzione de Passi per Tutti, aprontada dae s’Unione Italiana Ciechi de Aristanis e dae sa Polisportiva Runners de Aristanis.

Semper in tzitade, domìniga sero comintzat sa rassigna “Musica nelle sere d’estate”, posta a intro de sa de 52 Istajones Contzertìsticas de s’Ente Concerti “Alba Pani Passino”. In su Museu Diotzesanu Arborense su cuntzertu de inauguratzione “Oltre il mare…” cun sa còpia Silvia Careddu (flàutu) e Simone Onnis (chiterra).

In ùrtimu, su teatru est protagonista: firmat in tzitade sa cumèdia satìrica “La poltrona del Sindaco”, iscrita e dirìgida dae Domenico Cugusi. A pustis de s’ispetàculu in Terraba, apuntamentu domìniga sero cun s’assòtziu teatrale Nèmesi, in su palcu de su Centro Studio Danza.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.