Su tzìnema faeddat de su territòriu

Novas Aristanesas, martis 30 de làmpadas de su 2026

Su tzìnema faeddat de su territòriu – Su tzìnema diventat semper prus istrumentu pro faeddare de su territòriu. In provìntzia de Aristanis, in sos meses passados, initziativas culturales meda ant postu in primu pianu sa memòria colletiva, interessende sas generatziones noas e mudende traditziones e paesàgios in istòrias de cumpartzire.

In Paulle sa Consulta de sos giòvanos at fatu su progetu “Ammentos”, unu-docufilm chi regollet sas testimonias de sos betzos pro preservare ritos e usàntzias de sa bidda. S’initziativa, ghiada dae su presidente Simone Ponti, naschet cun sa punna de sarvare s’identidade culturale de sa bidda cun sa boghe de sos custodes suos de sa memòria. Sas ripresas documentant momentos simbòlicos comente su sàrtiu de su fogu e su ritu de s’abba muda in sa festa de Santu Giuanne Batista.

In Arborea s’est fatu, imbetzes, su progetu “Arborea Stories” chi previdet de fàghere unu docu-film in ue sunt protagonistas sos prus giòvanos. Pitzocos e pitzocas narant comente vivent su territòriu, ite dificultades b’at e ite bisos tenent pro su tempus chi at a bènnere. Su progetu est divènnidu luego unu laboratòriu partetzipadu in ue sos giòvanos isperimentant non solu sa retzitatzione, ma fintzas sas tècnicas de sa produtzione audio-visiva.

In Terraba e in Marceddì, su limbàgiu audio-visivu diventat fintzas formatzione. Su progetu “Raccontare la laguna” at interessadu partetzipantes in cursos de iscritura, regia, fotografia, sonu e montàgiu finende cun sa realizatzione de unu corto-metràgiu dedicadu a s’abbaloramentu de su paisàgiu lagunare. E, semper in Marceddì, su progetu de s’assòtziu Paesaggio Gramsci chi a pustis de sa pubblicatzione de “Dopo Baroni in laguna”, libru de ammentos orales e chircas istòricas in contu de sa vida de sos piscadores de sa provìntzia de Aristanis, at fatu puru su docu-film de Franco Brogi Taviani intituladu “Sale nel sangue”.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.