Sos ispidales e sas domos de comunidade in sa provìntzia de Aristanis

Novas Aristanesas, martis 9 de làmpadas de su 2026

Sos ispidales e sas domos de comunidade in sa provìntzia de Aristanis – In provìntzia de Aristanis est leende forma sa riforma de sa sanidade territoriale, cun Case e Ospedali di Comunità in arrivu destinados a afortigare s’assistèntzia de prossimidade. Unu cambiamentu sustènnidu dae sos fundos de su Pnrr chi però si cunfrontat cun una crititzidade ancora pesante: giai 50 mìgia tzitadinos sunt ancora sena unu dotore de famìllia, segundu su chi decrarat sa Asl 5 de Aristanis e b’est s’arriscu chi sa cosa siat semper prus grave cun sos pensionamentos in arrivu de àteros dotores de base.

Pro garantire sa continuidade de sas curas, sa diretora generale de s’Asl 5 Grazia Cattina at cunfirmadu pro totu su 2026 su progetu de sos ambulatòrios Ascot istituidos pro parare fronte a sa mancàntzia de dotores de base. Pro su servìtziu est istada previdida un’ispesa de giai 1,8 milliones de èuros.

A su matessi tempus sighit su cumprimentu de sa riforma de sa meighina territoriale. In provìntzia sunt prevididas sete Domos de sa Comunidade: duas hub in Aristanis e Bilartzi e chimbe spoke in Bosa, Làconi, Samugheo, Santu Lussurzu e Tramatza. A custas s’agiunghent s’Ispidale de Comunidade de Bilartzi, giai operativu e destinadu a èssere potentziadu, e cussu de Bosa, in fase de ativatzione.

Sas istruturas noas ant a ospitare a manu a manu dotores, infermieris de comunidade, ispetzialistas, servìtzios amministrativos e percursos dedicados a sos malàidos crònicos, cun sa punna de redùere sas intradas impròprias a sos ispidales e afortigare s’assistèntzia in su territòriu. Giai ativa sa Domo de sa Comunidade de Santu Lussurzu, in ue sunt comintzados sos servìtzios de curas primàrias e continuidade assistentziale.

Non mancant sas crititzidades: in Tramatza carchi servìtziu est comintzadu mentres su cantieri est ancora abertu. S’assòtziu Art32 at sinnaladu traballos in cursu e mancàntzias istruturales, domandende chi su modellu nou siat valutadu in s’operatividade reale de sos servìtzios.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.