Sa zona de Terraba est preparende·si a s’istiu

Novas Aristanesas, chenàbura 26 de làmpadas de su 2026

Sa zona de Terraba est preparende·si a s’istiu – Sa zona de Terraba est preparende·si a s’istiu cun isport, mùsica e traditziones. In su territòriu de s’Unione de sos Comunes Terrabesa, tantos sunt sos apuntamentos chi ant a acumpangiare sos residentes e sos bisitadores finas a su mese de cabudanni avantzadu. In Marrùbiu est giai bene aviadu “E…state a Marrubiu”, su programma promòvidu dae s’amministratzione comunale paris cun Pro Loco, assòtzios e realidades de su territòriu, cun s’agiudu de sa Regione Sardigna. Un’istiu pensadu pro totu sas edades, chi ponet paris isport, intratenimentu e identidade locale: dae su Summer Camp pro pitzinnos e pitzocos a sos torneos de biliardinu, pallavolo de ispiàgia e fùbalu a 5, finas a sos cuntzertos de s’Iscola Tzìvica de Mùsica e a sos seranos dedicados a su folclore.

Non mancant sos momentos collegados a sa traditzione religiosa e populare, comente sos festegiamentos de Santa Anna, chi ant a animare sa bidda cun eventos isportivos, ballos in pratza e initziativas de sotzialidade. Paris cun custos, b’at finas tzìnema suta sos isteddos, rassignas fotogràficas, apuntamentos culturales e gastronòmicos chi faghent apretziare su mundu assotziativu locale.

Su tzentru urbanu si preparat finas a vìvere sos seranos de istiu cun una novidade importante: in carrera Tirsu b’at a àere un’ìsula pedonale serale finas a su 30 de cabudanni, cun divietu de passare e de si bi firmare a su sero. Unu sèberu pensadu pro megiorare sos logos pùblicos e pro agiuare sas atividades cummertziales.

Su fervore de su territòriu ponet in parte finas a Arborea: su Comune at comintzadu unu percursu de progetatzione partetzipada collegadu a su programma “PR Sardegna FESR 2021-2027”, cun s’obietivu de elaborare unu modellu de turismu praticàbile e partetzipadu. Su progetu previdet interventos istruturales, signalètica inclusiva, tecnologias digitales e atividades pro sensibilizare sa gente pro chi su godimentu de su territòriu siat prus cumpletu e informadu, ponende in parte entes de su de tres setores, assòtzios e tzitadinos.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.