Novidades e bonos resurtados pro sas iscolas tzìvicas de mùsica de sa provìntzia de Aristanis

Novas Aristanesas, martis 16 de làmpadas de su 2026

Novidades e bonos resurtados pro sas iscolas tzìvicas de mùsica de sa provìntzia de Aristanis – Est unu tempus ricu de atòbios pro sas iscolas tzìvicas de mùsica de sa provìntzia de Aristanis, intre sàgios finales, cursos noos e programmatzione pro s’annu iscolàsticu 2026/2027. Sas istitutziones musicales de su territòriu cunfirmant su ruolu educativu e culturale issoro, interessende istudiantes de ogni edade.

In Aristanis sunt abertas finas a su 30 de cabudanni sas iscritziones a s’Iscola tzìvica de mùsica. S’oferta cumprendet istrumentos clàssicos e modernos, cantu, òrganu, launeddas, organitu, informàtica musicale, propedèutica e cantu corale. Cunfirmadu fintzas “Nati per la musica” dedicadu a sos pitzinnos dae 0 a 3 annos. Dae inoghe a pagu tempus, imbetzes, sa letzione magistrale a gratis in contu de cantu armònicu, cantu difònicu e throat singing, in programma su 20 e 21 de làmpadas cun Ilaria Orefice.

Sighint puru sos sàgios de fine annu: a pustis de su cuntzertu de sas classes de cantu corale e òrganu in sa crèsia de Santu Martinu, su 24 de làmpadas in pratza Eleonora s’at a fàghere una serada dedicada a sa mùsica moderna e a s’organitu.

Partetzipatzione manna pro s’Iscola tzìvica Guilcer Barigadu, chi ocannu at superadu sos 500 allievos. Sos sàgios finales si sunt fatos in tres dies intre Bilartzi e Abbasanta, cun esibitziones de pianoforte, cantu, chitarra, bateria, fisarmònica e mùsica corale. S’iscola at fintzas fatu initziativas culturales meda, intre cuntzertos e collaboratziones cun eventos de su territòriu.

Soddisfatziones fintzas pro s’Iscola tzìvica “Alessandra Saba” de Marrùbiu, protagonista in su cuncursu “Città di Nuoro” cun 6 allievos premiados in su pòdiu, in sas categorias trumba, bateria e pianoforte.

Pro s’annu nou s’iscola at antitzipadu a su 15 de cabudanni s’iscadèntzia de sas iscritziones, a manera de megiorare sa programmatzione de sas letziones e de sos sàgios. Intre sas novidades b’est su cursu pro DJ, dedicadu a sa mùsica e a sa produtzione digitale. Abertu fintzas su bandu pro sos dotzentes de su triènniu 2026 – 2029.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.