Mùsica, cultura e isport in custa coa de chida in provìntzia de Aristanis

Novas Aristanesas, giòbia 11 de làmpadas de su 2026

Mùsica, cultura e isport in custa coa de chida in provìntzia de Aristanis – Est una coa de chida rica meda de addòbios de non pèrdere, custa puru, in provìntzia de Aristanis.

In Crabas ddoe faghent festa manna pro su de 30 anniversàrios de su Karmis, su binu prus nòdidu de sa Cantina Contini 1898 nàschidu dae s’ammisturu intra de Garnatza e Vermentinu. Su primu addòbiu est cras a merie cun su cunvegnu “Karmis 30 – Dae is raighinas a su mercadu”. In sa mesa de is relatadores, paris cun Antony Muroni, diretore de sa Fundatzione Mont’’e Prama, ant a èssere presentes boghes de sa chirca, de s’antropologia, de s’economia e de su mundu enològicu.

Chevrolet, Dodge, Ford, Pontiac e àteros modellos antigos e prus pagu antigos: sàbadu a merie, in su Tzentru polivalente de Zrofolliu, s’at a pòdere bìere sa mustra “Màchinas americanas in giru”.

Festa manna in su bighinadu de su Coro de Gesùs de Aristanis: cumentzat sa de bator editziones de su Coro de Gesùs Festa de sa Mùsica, dae cras e fintzas a domìnigu, cuncordada dae s’Obreria de su Coro de Gesùs. Intra de is òspites prus de importu, sàbadu a merie ddoe at a èssere su cantautore e repper Fred De Palma in su palcu de s’Arena Coro de Gesùs.

In Aristanis etotu, sàbadu a merie, s’at a pòdere bisitare sa crèsia de Santu Martinu extra moenia cun mùsica sonada in presèntzia gràtzias a “Abertos pro Bois a suta de is Isteddos”, una faina cuncordada in totu Itàlia dae su Touring Club Italianu.

Su Tzentru pro is Servìtzios Culturales U.N.L.A. de Aristanis oferit, imbetzes, tzìnema sardu cun sa rassigna “Bisiones Sardas”, chi contat sa Sardigna cun su tzìnema. In projetzione ddoe ant a èssere sete curtzumetràgios chi ant a dare un’idea de ite est su produsimentu curtzu in s’Ìsula chi imprassat gèneres e temas diferentes.

In Sabarussa, sàbadu e domìnigu, s’at a pòdere ascurtare e bìere una masterclass de cantu corale cun duos maistros de diretzione de coros polifònicos nòdidos a livellu internatzionale, Pasquale Veleno e Sandro Pisanu. Dda cuncordant su Coro polifònicu “Santu Gregori” de Sabarussa e sa Federcori.

In fines, in Ilartzi, sàbadu ddoe faghent su Torneu de is Levas 2026, sa manifestatzione de isport e recreu de giogu de sa botza a 5 cuncordada dae sa leva 1986.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.