Is Comunes sena de sìndiga/u in provìntzia de Aristanis 

Novas Aristanesas, giòbia 4 de làmpadas de su 2026

Sa crisi polìtica chi at pertocadu unas cantas biddas de sa provìntzia de Aristanis at portadu a su cummissariamentu de is Comunes de Prammas, Uras e Boroneddu, chi oe s’agatant sena de un’amministratzione elèghida, mentras in Bidoniu pro is eletziones de domìnigu e lunis no ddoe ant presentadu lista peruna.

In Prammas su Consìgiu comunale ghiadu dae su sìndigu Emanuele Cadoni dd’at annuddadu sa Giunta regionale a pustis de is dimissiones firmas de oto intra de assessores e consigieris, a pustis chi su primu tzitadinu (chi si fiat dimìtidu) nd’aiat retiradu is suas. Sa Regione at nominadu cummissària istraordinària a Donatella Mancosu, chi at a ghiare su Comune fintzas a is eletziones de su 7 e de s’8 de làmpadas. Pro is eletziones ant presentadu una lista isceti, “Una boxi noa”, cun candidadu a sìndigu Andrea Pinna.

Sa pròpria cosa est acontèssida in Uras, in ue sa Giunta regionale at ordinadu s’annuddamentu de su Consìgiu comunale nominende cummissàriu a Giovanni Basolu. Totu custu a pustis de sa sentèntzia de su Consìgiu de Istadu chi aiat annuddadu sa deliberatzione pigada de s’amministratzione pro chircare de evitare su cummissariamentu a pustis de is dimissiones de sete consigieris. Is giùighes ant apostivigadu s’illegitimidade sa remplasadura de unu de is dimissionàrios, favoressende aici s’annuddamentu de s’assemblea. Su sìndigu Samuele Fenu aiat defensadu su traballu de sa majoria sua, narende chi aiat traballadu pro “s’interessu de sa comunidade”, pro assegurare sa sighidura amministrativa e is servìtzios de importu.

In Boroneddu, imbetzes, est istadu su sìndigu Serafino Angelo Mele chi at lassadu s’incàrrigu. Passada s’iscadèntzia pro nde retirare is dimissiones suas, su Comune dd’ant a cummissariare. Mele at denuntziadu “partziduras e tìrrias” in bidda chi ant istorbadu sa sighidura de s’esperièntzia amministrativa.

In fines, in Bidoniu, no ant presentadu lista peruna pro is amministrativas e duncas, a inoghe puru, abetende àteras eletziones, ddoe at a arribare unu cummissàriu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.