In provìntzia de Aristanis comintzat a manera sèria sa gherra a sos fogos

Novas Aristanesas, chenàbura 19 de làmpadas de su 2026

In provìntzia de Aristanis comintzat a manera sèria sa gherra a sos fogos – Sunt giai 500 sos fogos chi ant luadu s’ìsula dae cando a fine de su mese de maju est comintzada sa campagna contra a sos fogos e sa provìntzia de Aristanis non s’est sarvada. Unu contu pesante meda chi faghet previdire un’istiu dificultosu. Su prus de sos fogos sunt causados dae brusiare in campagna, cosa chi dae sa prima die de trìulas a su 14 de cabudanni non s’at a pòdere prus fàghere.

L’at cunfirmadu su diretore de s’ispetoradu forestale, Michele Chessa, ammentende chi s’annu coladu intre cabudanni e santugaine si fiant registrados prus de 500 episòdios in sos duos meses prus crìticos. A su chi at riferidu, giai dae paritzas chidas sunt comintzados sos controllos a gente chi aiat otentu contributos Pac suspetada de àere brusiadu sende chi sa normativa no lu permitiat prus.

In Fenosu sa base operativa oramai est ativa de su totu: a pustis de sa mobilitatzione de s’elicòteru lèbiu e de s’aviamentu de su tzentru operativu provintziale su 27 de maju, est imbàtidu finas su Super Puma, chi nche podet leare finas a 4mìgia litros de abba e chi est gestidu, comente cussu de Alà, dae sa sotziedade altu-atesina Heli Austria. In provìntzia si prevident 14 bàrdias gestidas dae Forestas, ses giai operativas intre Pabarile-Santu Lussurzu, Sèneghe, Grìghini, Sinis, Sinnarìolo e Mragaxori, presidiadas pro oto oras a sa die e chi ant a crèschere a 16, cun su Grìghini giai bardiadu 24 oras subra de 24. Noranta sos operadores forestales impignados in su territòriu, agiuados dae vìgiles de su fogu, barratzellos, Protetzione tzivile e voluntàrios: sas cumpangias de sos barratzellos oe intervenent finas in sos comunes a làcana e tenent drones e sistemas Gps pro s’avistamentu.

Cunfirmada finas pro su 2026 sa base de istiu de sos vìgiles de su fogu in Terraba, in carrera Neàpolis, operativa dae sa prima die de trìulas a su 31 de austu gràtzias a sa Giunta comunale: at a garantire interventos prus lestros in totu sa zona de Terraba, in ue intrant finas Arborea, Marrùbiu, Arcidanu e Uras.

 

 

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.