Giòvanos chi istimant sa traditzione sarda: sos contos de Giòrgia e de Emma

Novas Aristanesas, martis 23 de làmpadas de su 2026

Giòvanos chi istimant sa traditzione sarda: sos contos de Giòrgia e de Emma – Sas traditziones sardas agatant fortza noa e continuidade in sa visione de sas generatziones noas. In custa prospetiva s’inserint sas esperièntzias de duas giòvanas de sa provìntzia de Aristanis, Giòrgia Boi e Emma Zedda. Duas istòrias diversas ma unidas dae su matessi filu: sa voluntade de costoire e rennoare sas traditziones, faghende·las vìvere cun s’abbaidada de sas generatziones noas.

Giòrgia Boi, de Solanas, sas dies passadas, at fatu s’esame de tertza mèdia in s’iscola segundària de primu gradu “Eleonora d’Arborea” de Aristanis, presentende una tesina in contu de su raportu intre traditziones de s’Ìsula e modernidade. S’istudentessa, de su 2012, at seberadu de si pònnere su bestire traditzionale de Crabas, presentende·si fintzas iscurtza, comente sinnale de ligàmene profundu cun sas raighinas suas. In su percursu multi-disciplinare suo, at faeddadu de Gràtzia Deledda, Giuseppe Biasi e de s’arte sarda de su tessìngiu, finas a imbàtere a s’etnomusicologia e a sas traditziones populares comente sa Cursa de sos Iscurtzos e sa festa de Santu Sarbadore.

“Apo seberadu custu argumentu ca sa Sardigna no est ebbia un’ìsula bella meda, ma est sa terra in ue so nàschida e crèschida e chi oe in die mandat a dae in antis sas traditziones culturales suas, un’argumentu chi m’est caru meda”, at cummentadu.

Su 16 de làmpadas passadu, imbetzes, in Santeru, sa giòvana Emma Zedda at fatu un’esperièntzia de importu in sa protzessione in onore de Santa Sofia. Invitada dae su comitadu organizadore, at acumpangiadu cun s’organitu suo sa protzessione, realizende unu sognu pro more de s’impignu suo e de sa disciplina. Sighida dae su mastru Riccardo Murru e agiudada dae sa famìllia, Emma at afrontadu sa prima protzessione sua a pustis de prus pagu de un’annu de istùdiu de s’istrumentu, cumpartzende su percursu cun àteros musitzistas e portende a cumprimentu un’esperièntzia forte e formativa.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.