Cultura, màndigos bonos e traditzione in sa coa de chida de sa provìntzia de Aristanis

Novas Aristanesas, giòbia 18 de làmpadas de su 2026

Cultura, màndigos bonos e traditzione in sa coa de chida de sa provìntzia de Aristanis – Sunt paritzos is addòbios in custa coa de chida in provìntzia de Aristanis.

In Neoneli incarrerat sa de 10 editziones de Licanìas, su fèstival de faeddos, artes e paesàgios, chi ocannu tenet a tema “Sortes” a suta de sa ghia artìstica de Davide Corriga. Oe si cumentzat in sa Domo de sa Cultura cun su giornalista Nicola Muscas. Fintzas a domìnigu addòbios, ispetàculos e òspites comente a Vera Gheno, Pierpaolo Capovilla e Ascanio Celestini.

Tastaduras, addòbios e cuntzertos: s’istadiale de sa Fundatzione Mont’’e Prama cumentzat cras a merie cun s’Archeobeer Fest, chi pro tres dies – fintzas a domìnigu – at a abbiatzare sa biddighedda de Santu Sarbadore de su Sinis. Custu merie, imbetzes, semper in Crabas, sa presentada de su libru de Anthony Muroni “Sa firma de su re”, in sa biblioteca comunale.

Sàbadu a merie, in Santu Lussurzu, sa crèsia de Nostra Sennora de is Ànghelos acasàgiat sa de 16 editziones de “Solstìtziu de istadiale in mùsica”, su cuntzertu a incuru de sa Polifònica Lussurzesa “Claudio Monteverdi”.

A Aristanis, in pratza de Manno, ddoe arribat sa Festa de su Gustu Internatzionale, ùnica firmada in provìntzia de su Giru Sardigna 2026. Dae custu merie e fintzas a domìnigu, cosa de papare bia-bia, birras artesanales e istentos intra de sabores, traditziones e culturas dae totu su mundu. Isport, inclusione e bonucoro dae cras in Turre Manna cun is tres dies de “Potèntzia de s’isport” cuncordadu dae s’assòtziu Sea Scout.

Mùsica, artesania e traditziones in Iscanu dae cras e fintzas a domìnigu cun sa “Festa de tota bidda”, sa manifestatzione istòrica chi dae su 1979 contat sa bidda de Monteferru intra de memòria e su connotu de su logu.

In Mogoredda, imbetzes, festa manna pro sa de 33 editziones de sa Sagra de sa berbeghe. S’apuntamentu est pro sàbadu in su campu isportivu.

In fines, sàbadu a merie in Norghiddo, in sa fratzione de Domusnoas, in pratza de Corrias ddoe presentant su libru “Deus est unu pastore” de Antonangelo Liori.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.