Crititzidade in sos Ascot in provìntzia de Aristanis

Novas Aristanesas, chenàbura 12 de làmpadas de su 2026

Crititzidade in sos Ascot in provìntzia de Aristanis – Unu malàidu intro de tres, est a nàrrere 50mìgia tzitadinos de sa provìntzia de Aristanis, est sena de dotore de famìllia. Nùmeros chi rapresentant bene una situatzione semper prus dificultosa pro sa sanidade territoriale e chi at cumbìnchidu sa Asl 5 a cunfirmare finas pro su 2026 su progetu de sos Ascot, sos Ambulatòrios agiuntos de comunidade territoriale.

In sa delìbera firmada dae sa diretora generale Grazia Cattina si ponet in evidèntzia comente una parte manna de sa gente est ancora sena assistèntzia primària de base. Una crititzidade chi at a sighire, bidu chi in sos meses imbenientes àteros dotores de meighina generale ant a andare in pensione.

Pro assegurare sa continuidade de su servìtziu, s’Azienda sanitària at prevìdidu de pònnere belle 1,8 milliones de èuros. Sos Ascot ant a sighire duncas a rapresentare un’amparu importante meda pro mìgias de utentes chi, sena de custos ambulatòrios, diant tènnere dificultade a otènnere finas sas prestatziones prus simpres, dae sas bìsitas a sas prescritziones.

In sos ùrtimos meses, però, non b’at mancadu problemas. Unos cantos dotores impignados in sos Ascot aiant signaladu ritardos in sos pagamentos, annuntziende chi su servìtziu podiat èssere suspesu si non lis pagaiant sos arretrados.

Sas dificultades nche calant subra de sa gente, chi sighit a signalare tempos longos e problemas pro otènnere sos servìtzios in totu sa provìntzia. Meda sunt custrintos a andare a sos Ascot e a sas Domos de comunidade finas pro retzetas o rinnovos de terapias. In sas dies passadas una malàida oncològica, a pustis de tantas oras intre Ascot e Guàrdia mèdica in Aristanis, no est resurtada a otènnere sa retzeta pro una meighina sarva-vida ca sos turnos disponìbiles fiant finidos. Un’acadimentu chi ponet in evidèntzia una retza nàschida pro pònnere remèdiu a sa mancàntzia de sos dotores de base, ma chi si distinghet ancora pro sos càrrigos artos, pro sos servìtzios dificultosos e pro s’organizatzione frammentada.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.