Contu a s’imbesse pro is fieras de s’artesania de sa provìntzia de Aristanis

Novas Aristanesas, lunis 29 de làmpadas de su 2026

Contu a s’imbesse pro is fieras de s’artesania de sa provìntzia de Aristanis – Sa provìntzia de Aristanis s’aprontat pro s’abertura de is fieras istòricas de s’artesania artìstica sarda de Mòguru e Samugheo, dae paritzos annos bidriera de is cosas de primore de s’Ìsula nostra e chi arranguitzant a mìgias e mìgias de bisitadores.

In Samugheo ocannu ddoe faghent sa de 59 editziones de “Tessìngiu”, fìgia de sa Mustra istòrica de s’artesania de su Mandrolisai e oe intra de is manifestatziones prus de importu de custu setore in Sardigna. Torrada giai dae unas cantas editziones a sa sea de sa Cantina sotziale betza de bia de sa Brigata Tàtari, sa rassigna contat comente totu sa sabidoria de su ischire fàghere est mudada cun su tempus in su faghimentu de tapissos e àteras formas de tessìngiu, istèrgiu de terra e tzeràmicas, prendas de oro e de prata, bidros e àteros trastes de design. Un’àndala chi ponet paris sa memòria de is pintaduras connotas dae s’antigòriu cun su design de is dies de oe, cun s’agiudu fintzas de artistas internatzionales.

Fintzas prus longa est s’istòria de sa Fiera de s’Artesania artìstica de sa Sardigna de Mòguru, chi ocannu lompet a sa de 65 editziones. Nàschida pro fàghere a connòschere is produsimentos de su logu, sa manifestatzione s’est furriada a èssere una de is bidrieras prus de importu de is cosas artesanales de primore de s’Ìsula. In is 2.500 metros cuadrados de sa Fiera de su Tapissu si ddoe podent bìere tessìngiu, linna, prendas, tzeràmicas, trastos de ferru, resòrgias e produsimentos agroalimentares. Unu connotu chi s’est annoadu in su tempus gràtzias a su cunfrontu intra de maistros artesanos, architetos e designer.

Ocannu is duas manifestatziones ant a incarrerare sa pròpria die. Sàbadu 18 de trìulas at a abèrrere siat sa Fiera de s’Artesania artìstica de sa Sardigna de Mòguru, fintzas a su 13 de cabudanni, siat “Tessìngiu” in Samugheo, in programma fintzas a su 7 de cabudanni, cun un’abertura prus longu cunforma a cudda de is annos passados. Duos apuntamentos chi ant a acumpangiare s’istadiale in provìntzia de Aristanis, cunfirmende su rolu de primore de s’artesania artìstica pro s’avaloramentu de s’identidade culturale de s’Ìsula.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.