Una coa de chida de eventos in provìntzia

Novas Aristanesas, chenàbura 8 de maju de su 2026

In provìntzia de Aristanis eventos meda in programma pro sa coa de chida. Sa de 30 editziones de Monumentos Abertos imbatet a Aristanis puru: cras e domìniga crèsias, turres e palatzos istòricos ant a èssere abertos e cun guidas de primore. Semper in tzitade cras mangianu in su parcu isportivu de Toràngius un’editzione noa de “Illuminiamoci di blu – Per l’autismo un mondo a colori” e in s’Hospitalis Sancti Antoni b’est su cunvegnu “L’Intelligenza Artificiale – Il futuro non aspetta” a incuru de su Lions Club Oristano cun su patrotzìniu de su Comune. Custu sero imbetzes in su litzeu clàssicu “De Castro” s’ispetàculu “Amarsi, non armarsi! – Musica e parole per la pace”, de sos assòtzios Liberanimos e Gardenas.

Cras “Sentieri d’Arci” imbatet a su territòriu de Marrùbiu pro visitare sa cresiedda de campagna de Zuràdili, in mesu de sas carboneras antigas de Monte Arci.

Libros, jazz e binu in Nurachi cras sero pro CantinArte cun su libru “Femmenella” de Davide Piras e su cuntzertu de The Master Trio featuring Michele Bozza.

Diàgnosi primaria de su tumore a sa tita, informatzione in contu de autismu e solidariedade cun Genoni in Rosa chi cras e domìniga at a fàghere animatzione in Jaroi, imbetzes in Bilartzi si festat a Santu Micheli: custu sero sos ballos in pratza e sos Dilliriana aberint sa festa tzivile.

In Crabas pro sas Chenàburas in su Museu custu sero in sa Sala de cunferèntzias de su Museu tzìvicu b’at a àere unu biàgiu in sos retroscena de “Tharros Time Upon Time” cun Chiara Ligi.

Mùida de motores in Uras domìniga mangianu pro su de tres radunos de motos, vespas e màchinas antigas de su “Sons of Bikers”, su motoclub locale.

Cras sero in su teatru comunale de Terraba si rapresentat “La poltrona del Sindaco”, sa cumèdia satìrica de s’assòtziu Nèmesi.

In ùrtimu, in Sèdilo, generatziones a cunfrontu in contu de solidariedade: cras a merie, in su tzentru pro sos antzianos Sas De Elias, s’Atopu pro sa paghe de sa cooperativa L’Arca.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.