Sos parchègios a pagamentu in sas prajas de sa provìntzia de Aristanis

Novas Aristanesas, martis 26 de maju de su 2026

Sos parchègios a pagamentu in sas prajas de sa provìntzia de Aristanis – S’istiu est arribende e sunt torrende sos parchègios a pagamentu in sas prajas de sa provìntzia de Aristanis. Dae Crabas a Santeru finas a Cùglieri, aco’ sas tarifas.

In su Sinis su servìtziu est partidu a manera ufitziale sa prima die de maju. Sos primos logos interessados sunt Santu Giuanne de Sinis e Is Arutas, in ue sa firmada at a èssere a pagamentu finas a su 2 de santandria. A pustis b’ant a èssere fintzas Mari Ermi, Maimoni, Funtana Mèiga e Mare Mortu. Intre sas novidades, b’est puru Corrighias, inserida pro sa prima borta in intro de sos logos regulamentados. Sas tarifas sunt sas matessi de s’annu passadu e est cunfirmadu puru chi dae sas oto de sero a sa una de note non si pagat nudda.

In Cùglieri, in sas marinas de S’Architu e Santa Caterina de Pitinnuri, sos parchègios de colore biaitu diant dèpere intrare in funtzione dae sa prima die de làmpadas a su 30 de cabudanni. Sos giassos ant a èssere prus de 600 intre veturas e moto, cun tarifas dae 1,30 èuros a s’ora, dae sas 8 de mangianu a sas 8 de sero, e pagamentos agevolados pro sos residentes, proprietàrios de domos e traballadores istasionales. Su mèrcuris mangianu sos parchègios a inghìriu de carrera degli Oleandri e carrera dei Gelsomini, cherent lassados lìberos pro su mercadu rionale dae sas sete a sas duas; e in su mese de cabudanni in su giassu isterradu a canta a su litorale de S’Architu s’oràriu s’at a ridùere dae sas 8 de mangianu a sas 7 de sero.

Santeru puru si preparat a s’istiu: su comune puntat a ativare su servìtziu in sas marinas in intro de sos primos de làmpadas, cunfirmende sas tarifas de su 2025: dae sos 5 èuros pro sas firmadas curtzas (duas oras) finas a 12 èuros sa die in su lungomare de Putzu Idu. Tres èuros, imbetzes, pro duas oras in Mandriola, Sa Mesa Longa, Su Pallosu, Sa Marigosa, Sa Roca Tunda e Su Crastu Biancu, chi ant a divènnere 6 èuros pro firmadas finas a ses oras. Abarrat sa tarifa giornaliera de 20 èuros in sas borgadas, cunsideradas zona C. Cunfirmada puru sa serrada de su lungomare de Putzu Idu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.