Sa provìntzia de Aristanis istimat su sonu de sos motores

Novas Aristanesas, martis 05 de maju de su 2026

Sa provìntzia de Aristanis istimat su sonu de sos motores – In provìntzia de Aristanis su beranu nch’at torradu a sas istradas s’incantu de sos motores, intre radunos, garas e atòbios chi atirant apassionados dae totu s’Ìsula.

At fatu de aberi-pista, su 22 de martzu passadu, su tzentru de Aristanis in ue s’est fata sa prima editzione de “Fiori e motori di primavera”, promòvida dae su Coordinamentu tzitadinu de Fiat 500 Club cun su patrotzìniu de su Comune. In pratza Roma sas utilitàrias istòricas si sunt mustradas bestidas de colores e mudadas cun frores, in antis de s’isfilada in su tzentru de sa tzitade. Sa die est istada avalorada fintzas dae sa presentada de su libru de Francesco Carbini.

In Arborea, imbetzes, su 12 de abrile, s’est fata sa de chimbe editziones de Ichnusa Young Driver, prova de pretzisione dedicada a sos giòvanos chi tenent prus pagu de 40 annos apassionados de veturas de època. S’initziativa, a incuru de s’assòtziu Automoto d’epoca Sardegna e inserida in su Trofeo Asi Giovani, at aunidu sa gara a s’iscoberta de su territòriu, cunfirmende sa crèschida de sa manifestatzione.

Motores allutos fintzas in Ollasta, su 19 de abrile cun su de tres Motoraduno San Marco, s’initziativa chi dae tres editziones est intrada de deretu in su cartellone de sos eventos de sa Fiera istòrica de su 25 de abrile. B’aiat 420 iscritos tra mototziclistas e acumpangiadores chi ant leadu parte a su giru panoràmicu intre Zrofoliu, Sabarussa, Tramatza, Santeru, Arriora e Nuraxinieddu. A pustis, pràngiu in fiera e mùsica, in unu clima de festa cumpartzidu dae gente meda.

In sa coa de chida passada, su 2 e su 3 de maju, in Cùglieri s’est disputadu su slalom Cùglieri-Sa Madonnina, sa prima prova de su campionadu regionale Aci Sport Sardegna Slalom 2026, in giai tres chilòmetros de percursu cun deghe postatziones de birillos.

E su calendàriu pro sos apassionados de sos motores non si firmat: su 10 de maju in Uras b’at a èssere su de tres radunos de moto, vespas e veturas istòricas cun sos Sons of Bikers, su motoclub locale.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.