Sa coa de chida in provìntzia de Aristanis

Novas Aristanesas, chenàbura 29 de maju de su 2026

Sa coa de chida in provìntzia de Aristanis – Cultura, isport, mùsica e sabores in sa coa de chida in provìntzia de Aristanis.
Monumentos Abertos at a fàghere connòschere sos sitos culturales de Abas, Cùglieri e Terraba cun tantos eventos parallelos.

Cras sero un’apuntamentu nou in Cantina Caddeo in Nurachi pro CantinArte. In programma b’est s’inauguratzione de s’iscultura “Suoni” de Marco Pili, s’apericena literàriu cun Alessio Petretto, su cuntzertu de sos Cuarto de Cuba e sos nùmenes istòricos famosos de Radio Oristano.

In su tzentru polivalente de Crabas, cras sero si presentat su libru “La cena delle anime. Sa chena pro sos mortos” de Maria Laura Berlinguer. Chistionat cun issa Luca Solinas. Semper in Crabas, in su tzìnema betzu suta sos isteddos de carrera Regina Margherita si faghet “Nella Terra dell’Acqua”, sa mustra fotogràfica in contu de sos piscadores de sa zona de Aristanis, fata dae Mauro Raponi. Custu sero, imbetzes, s’apuntamentu est in su Tzìnema Ariston de Aristanis pro sa projetzione de su docufilm “Sale nel sangue” de Franco Taviani. Cun s’eventu in Crabas de cras, si serrant sa tres dies dedicadas a su progetu “Dopo “Baroni in laguna””, de s’assòtziu Paesaggio Gramsci.

In Aristanis, in carrera De Castro, ostiones, ispumantes sardos e mùsica cun “Wine Street Experience Sardegna”, segundu apuntamentu de su programma ideadu dae Craf da Banana, cun Cantina Còntini e Niedditas. Si serrat poi su calendàriu ricu de eventos pro sos 40 annos de atividade de s’Unitre de Aristanis: custu sero sa chena sotziale in pratza Manno. A merie, imbetzes, su segundu in s’Hospitalis Sancti Antoni de “Primavera in archivio”, cun Roberto Maria Pichedda e sa nàschida de s’iscola tzitadina pro mesu de sos registros de Consiglieria, torrende a contare finas s’istòria de su gesuita padre Giorgio Passiu.

In ùrtimu, in Turre Manna, cras mangianu unu cunvegnu in contu de isport e generatziones de cras a incuru de s’assòtziu culturale “Senatore Lucio Abis”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.