In provìntzia de Aristanis duos meses signados dae su lutu

Novas Aristanesas, martis 19 de maju de su 2026

In provìntzia de Aristanis duos meses signados dae su lutu – Intre abrile e maju sa provìntzia de Aristanis est istada signada dae lutos meda.

In Silì s’ùrtimu saludu a Giacomo Uras s’est fatu su 12 de maju in sa crèsia de santu Pedru Apòstolu, cun partetzipatzione manna de sa comunidade. Tècnicu de laboratòriu de s’ispidale de Aristanis, impignadu in su sindacadu e in sa Democratzia Cristiana, babbu de s’ex vitze-sìndigu Giuliano Uras e de su cumandante de sa Politzia locale Gianni Uras, Uras fiat istimadu pro su caràtere suo allegru e pro s’impignu in su sotziale.

S’11 de maju est mortu de improvisu su dirigente iscolàsticu Sergio Repetto, originàriu de Casteddu in servìtziu in s’Ufìtziu iscolàsticu provintziale de Aristanis. In trìulas diat àere cumpridu 60 annos. In sa matessi die, tragèdia in Sèdilo pro sa morte de una pitzinnedda de naschidòrgiu, nàschida in s’ispidale de Santu Martinu de Aristanis, e morta a pustis de su trasferimentu urgente dae Pauli a su Bambin Gesù de Roma.

In Arborea, a pustis de sa morte a primos de abrile de Rocco Olita, 89 annos, ex diretore tècnicu de su Cunsòrtziu de bonìfica Terraba-Arborea, puntu de riferimentu de sa comunidade e protagonista de sos assòtzios locales, s’est agiuntu unu lutu nou.
Sas dies passadas est mortu Sergio Lotta, 73 annos, volontàriu ativu in sos assòtzios e in s’isport, dipendente Cooperativa 3A, ammentadu pro sa disponibilidade e presèntzia in sa comunidade.

In Aristanis a primos de abrile est mortu s’ex calciadore e allenadore Piero Moro, protagonista cun sa Tharros in sos annos Sessanta e Setanta e a pustis in panchina cun tantas iscuadras locales. Isportivu apretziadu, aiat seberadu sa Sardigna comente segunda domo.

In fines, Donigala puru at dèpidu fàghere sos contos cun unu lutu in abrile, cussu de Marinella Sanna, 68 annos, artesana ceramista cun “Ceramiche MariS”, connota meda e ativa in sa vida sotziale e isportiva de sa fratzione de Aristanis.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.