Atentzione a sa rìghina: sos cussìgios de sa Asl 5 pro si defensare 

Novas Aristanesas, martis 12 de maju de su 2026

Cando benit su tempus bonu torrat puru su perìgulu de sa rìghina. In sos meses de beranu e de istiu creschet sa possibilidade de èssere puntos dae custos parassitas, difusos meda peri sas campagnas e in logos in ue b’at erba alta e in logos arrodados. In gènere cando mòssigat non dolet e no est perigulosu, ma s’arriscu est sa trasmissione de maladias infetivas.

In Sardigna sa maladia prus difusa est sa “Febbre Bottonosa del Mediterraneo”, una forma de rickettsiosi trasmìtida màssimu dae sa rìghina palda de su cane, sa Rhipicephalus sanguineus. Est prus raru chi potzant trasmìtere fintzas infetziones virales, comente sa encefalite dae rìghina.

Comente avertent dae sa Asl 5 de Aristanis, tocat de ischire comente si cumportare in casu de puntura e in prus tocat de s’ammentare chi non totu sas rìghinas sunt infetas, ma est de importu a intervènnere luego.

Nde cheret tirada cun una pintzighedda a punta fine, aferrende su parassita su prus a canta possìbile a sa pedde e tirende cun delicadesa, sena ischitzare su corpus de sa rìghina pro fàghere a manera chi non nde besset a pìgiu carchi agente patògenu. A pustis de nde l’àere tirada tocat de disinfetare su tretu in ue fiat atacada e de nde leare su pìculu abarradu in sa pedde cun un’agu istèrile. Si sa vatzinatzione antitetànica est iscadida, est mègius a si rivòlgere a su dotore.

De fundamentu est fintzas sa preventzione. Cando si andat a campagna est mègius a si pònnere cartzones longos, bestires craros e iscarpas serradas, impreare spray repellentes e controllare bene sos bestires e sa pedde apenas torrados a domo. Atentu mannu bi cheret cun sos animales domèsticos chi cherent tratados cun produtos anti-parassitàrios.

In casu de frebba, dolore de conca, dolores articulares o si sa pedde est ruja in sas dies a pustis de sa puntura, s’avertèntzia de sa Asl est de cuntatare luego su dotore.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.