Arte de fèminas in provìntzia de Aristanis

Novas Aristanesas, giòbia 28 de maju de su 2026

Arte de fèminas in provìntzia de Aristanis – Tres artistas, tres caminos diferentes, una trama isceti chi contat custos logos cun gestos, materiales e bisiones cuntemporàneas. In provìntzia de Aristanis s’arte de is fèminas faghet a protagonista.

Comente est acontèssidu cun sa chirca artìstica de Maria Jole Serreli, marrubiesa, chi si movet intra de is cuncordos chi faghet e sa memòria. Su cuncordu piticheddu “In butzaca cantigheddos de domo isceti”, seberada comente a sìmbolu de sa de 30 editziones de “Monumentos Abertos”, movet dae su degòlliu de su terremotu de su 2016 in su Tzentru Itàlia, tramudende-ddu in meledu in contu de sa pagu seguresa de su bìvere. Aici etotu comente in “Is Mamas de su Remèdiu”, unu cuncordu fatu de ferru, roba e filos de cotone de simanas diferentes, dae is annos Trinta de su sèculu passadu a oe, e chi su pùblicu dd’at pòdidu apretziare su 23 e su 24 de maju, in ocasione de Monumentos Abertos. Inoghe puru s’artista at fraigadu un’òpera a cumone, nàschida dae sa partetzipatzione de sa comunidade de Marrùbiu, unu paru de archìviu de contos de fèminas e traditziones cumpartzidas.

Unu ligàmene a strintu cun sa Sardigna ddu tenet fintzas su traballu de s’artista giòvana aristanesa Valentina Murtas. Cun su progetu “Pintadu a tie”, s’artista in custas dies at torradu a sa comunidade unas cantas òperas chi at donadu a su Comune de Aristanis e a sa Pro Loco: immàgines dedicadas a sa Sartìllia, a sa giuighissa Lianora de Arbaree e a is sìmbulos identitàrios de sa tzitade. Unu caminu nàschidu dae sa distàntzia e chi s’est furriadu a èssere una torrada de sentidos, in ue sa tzitade si tramudat in unu museu ispartu e in una memòria cumpartzida.

Ma non si podent ismentigare is bighinados antigos de Aristanis, in ue s’arte si faghet presèntzia fitiana gràtzias a s’istèrgiu de terra e a is tzeràmicas de Valentina Pisu, issa puru aristanesa, formada in su Litzeu artìsticu “C. Contini”. Is òperas suas, ispartas peri is rugas de sa tzitade, comente a “Sa pipia cun su gatu” in bia de Angioy, imbonint is logos pùblicos e invitant a torrare a iscobèrrere sa tzitade cun una mirada prus lenta e funguda.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.