Una coa de chida longa prena de eventos in territòriu de Aristanis

Novas Aristanesas, chenàbura 3 de abrile de su 2026

Una coa de chida longa prena de eventos in territòriu de Aristanis – Pro sa coa de chida de Pasca eventos meda in provìntzia de Aristanis.
In Baullau torrat sa de 45 editziones de sa cursa de su lunis de Pasca, sa manifestatzione regionale de cursa de istrada a incuru de s’assòtziu isportivu diletantìsticu “Gruppo Sportivo Atletica Bauladu”. Sa gara si curret lunis, cun partèntzia e arrivu pròpiu dae su parcu comunale de Zinnuri a percursu ùnicu de 9,800 chilòmetros.

Fide e traditzione in Aristanis pro Chida Santa. Custu mangianu in sa Seu su ritu de S’Incravamentu e a merie sa protzessione de Sa Maria dae sa crèsia de Santu Martinu a cara a sa Seu e a pustis, semper in sa Seu, sa funtzione de sa Passione de Nostru Segnore cun su ritu de Su Scravamentu e sa protzessione de S’Interru. Cras su bizadòrgiu solenne de Pasca in Note Santa, e su mangianu de Pasca su ritu de S’Incontru in pratza Giovanni Paolo II e sa missa in sa Seu, sighida dae sa protzessione de Sa Glòria. Sas protzessiones e su ritu de Su Scravamentu sunt acumpangiados dae su coro “Maurizio Carta” de Aristanis e sas funtziones litùrgicas dae sa Polifonica Arborense de Aristanis.

Non fede ebbia, però. Apuntamentu cun sa Pro Loco de Aristanis e sa Leva 66 de Donigala cun “Pasquetta al parco” in su parcu de Santa Petronilla in Donigala Fenughedu. Màndigos bonos, divertimentu e mùsica pro totus.

Dae domìniga e finas a martis Uras est in festa pro Santu Sarvadore. In prus de sos apuntamentos religiosos comente, pro esempru, Su fogadoi de lunis sero cun partetzipatzione de su grupu “Sa Linna”, b’at finas eventos tziviles: domìniga b’est su dj set de Fabio Casu e su lunis de Pasca ballos sardos in pratza Santu Sarvadore e a pustis sa dancehall cun “Isla Sound & Sista namely”.

In ùrtimu, lunis de Pasca in su Parcu de Zuràdili, in territòriu de Marrùbiu, cun Sa Leva 1976.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.