Sos giòvanos de sa provìntzia de Aristanis si distinghent in iscola e in sos isport

Novas Aristanesas, martis 21 de abrile de su 2026

Sos giòvanos de sa provìntzia de Aristanis si distinghent in iscola e in sos isport – Isport e iscola dant soddisfatziones mannas a sos giòvanos de sa provìntzia de Aristanis, protagonistas de resurtados de importu a livellu regionale, natzionale e internatzionale.

Su G.S. Judo Terralba s’est distintu cun 7 medàllias conchistadas intre campionados regionales e Gran Prix Giovanissimi: tres oros, tres de prata e unu brunzu. Intre sos resurtados prus de importu sos tìtulos regionales de Alessio Loi in sa categoria +90 kg e Gianluca Spanu in sos -73 kg. Provas bonas fintzas pro sos àteros atletas, cun piatzamentos chi cunfirmant sa crèschida de su grupu.

Resurtados bonos meda dae su nuoto: sa sotziedade All Together at bìnchidu bator medàllias in sas finales regionales Esordienti A, pro more de sos resurtados de Tiago La Greca, Giulia Sanna e Sara Mocci. Unu resurtadu chi est sa testimonia de su caminu bellu chi ant fatu sos atletas e de su traballu fatu dae sa sotziedade.

In sa pallavolo, sa Under 18 femminile de s’Ariete at conchistadu s’intrada a sa finale regionale, mustrende solididade e caràtere. Unu traguardu de importu chi como aberit su caminu a s’isfida pro su tìtulu a dae in antis de su pùbblicu de domo.

A livellu internatzionale, Maddalena Spanu at bìnchidu sa medàllia de prata in sos Europeos de sa classe Formula Wing in Nàpoli, leende·nche a Aristanis a subra de su pòdiu continentale.

In sas iscolas istudiantes meda si sunt cualificados in sas finales natzionales de sos Giogos Matemàticos de s’Universidade Bocconi; duos istudiantes de s’Istitutu Cumprensivu 1-2 de Aristanis con sede in Prammas, Nicolas Carta e Bernardo Demurtas, e tres istudiantes de s’Istitutu Cumprensivu 3-4 de Aristanis, Liam Putzolu, Giaime Madau e Maria Rita Casu.

Intre sas cosas prus de importu, cussa chi at fatu Inerio Vacca, istudiante de su litzeu “Mariano IV”, nominadu alfieri de sa Repùbblica pro su coràgiu chi at mustradu sarvende unu cumpàngiu in mare. Un’esempru mannu de umanidade e sensu tzìvicu chi rapresentat sos valores de sas generatziones noas.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.