Sos eventos de sa coa de chida in provìntzia de Aristanis

Novas Aristanesas, chenàbura 24 de abrile de su 2026

Sos eventos de sa coa de chida in provìntzia de Aristanis – Traditzione, gustu e divertimentu in custa coa de chida in provìntzia de Aristanis.

Est a canta a comintzare sa Fiera istòrica de Santu Marcu de Ollasta: oe si faghet su Pèsperu de sa Vigìlia in sa crèsia dedicada a su Santu patronu e cras sa protzessione, sa beneditzione de sas funtanas e sa missa pro Santu Marcu, e a pustis s’aberit sa Mustra Regionale de sas Ratzas Locales, su de bator Cuncursos Natzionales de Berbeghes e Crabas e su primu Cuncursu de su Caddu Sardu.

Domìniga in Mòguru b’est “Saboris Antigus”: sos sabores e sas sabidorias de unu tempus in unu percursu pro assagiare màndigos in sa parte antiga de sa bidda.

Dae oe e finas a domìniga, cun su Bosa Beer Fest, in oros de su frùmene Temo in Bosa b’at a àere assàgios de màndigos e eventos relativos a su mundu de sa produtzione de sa birra.

Dibàtidos, libros, tzìnema e mùsica finas a lunis cun sa Chida Gramsciana in Bilartzi, imbetzes domìniga Abas ammentat a Antoni Gramsci pro su de 89 anniversàrios dae sa morte.

Mùsica in direta e solidariedade custu sero in pratza Asilu in Siamajore pro “Aspettando il Patrick & Friends”.

In Aristanis pro “Storie dell’Arte”, custu sero in s’Hospitalis Sancti Antoni s’at a presentare su libru “Erbario della Memoria. Mondo vegetale e ricordi privati” e domìniga in su palasport de Sa Rodia su torneu subra-regionale Kim e Liù, cun sos mègius giòvanos chi pràticant su taekwondo.

Arte, memòria e comunidade cun “Le Madri del Rimedio”, s’òpera de Maria Jole Serreli chi s’at a presentare custu sero in su comune de Marrùbiu.

Custu sero apuntamentu dòpiu in Crabas cun “La muta voce del libro” de Rachele Mirai pro “Voci di Cabras” e cun sos iscavos de su nuraghe Cannevadosu pro sa rassigna “Venerdì al museo” aprontada dae sa Fundatzione Mont’e Prama.

E ancora, festa in Prammas pro Santu Antiogu Màrtire e Santa Rosa: finas a lunis unu programma prenu de devotzione, traditzione e ispetàculu.

In ùrtimu, oe in Paulle si faghet unu biàgiu intre istòria, mùsica e sabores de Guiltzier pro Sa die de sa Sardigna.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.