Sos cantieris in sos campusantos de sa provìntzia de Aristanis

Novas Aristanesas, martis 07 de abrile de su 2026

Sos cantieris in sos campusantos de sa provìntzia de Aristanis – Intre ismanniamentos, megioros e cantieris noos, campusantos meda de sa provìntzia de Aristanis sunt interessados dae unos cantos interventos. Dae Marrùbiu, Bosa, Santu Lussùrgiu finas a su cabu logu, si puntat a garantire logos adeguados e prus decoro.

In Marrùbiu sunt giai comintzados sos traballos pro fàghere prus de 400 postos noos tra lòculos, tumbas e capellas. Un’interventu mannu de 200 mìgia èuros, finantziadu in parte dae sa Regione e in parte dae su Comune, cun s’acabu prevididu in intro de su mese de trìulas. “Sos traballos pertocant su fràigu de logos noos”, ispiegat su sìndigu Luca Corrias. “No at a mancare su megioru de sa pavimentatzione e sa cura de sos logos birdes”.

S’assessore cun dèlega a sos Traballos Pùbblicos, Paolo Soru, agiunghet: “Custas òperas ant a garantire postos noos pro prus de deghe annos”.

A pustis de annos de firmada, fintzas pro su campusantu comunale de Bosa s’isblocat su cumpletamentu de lòculos. S’apaltu, assignadu su 7 de ghennàrgiu, serrat unu caminu comintzadu in su 2020 e rallentadu pro neghe de sa pandemia e de s’aumentu de sas ispesas. “Su cambiamentu b’est istadu in su mese de abrile de su 2024, cando a sas summas ancora disponìbiles pro sas òperas (104 mìgia èuros) b’ant agiuntu àteros 80 mìgia èuros arribados cun unu finantziamentu nou regionale”, narant dae s’amministratzione comunale ghiada dae su sìndigu Alfonso Marras.

Partidos puru sos cantieris pro ismanniare su campusantu de Santu Lussùrgiu, cun un’investimentu de 410 mìgia èuros. Prevididos lòculos noos, logos birdes e percursos chi si potzant praticare, in risposta a sa mancàntzia de logos pro sas sepulturas.

In Aristanis, in fines, sighint sos traballos a foras dae su campusantu, cun s’intrada noa, s’arburada chi aunit sa tzirconvallatzione noa cun su tzentru diretzionale e megioru de sas zonas birdes atretzadas. In programma fintzas s’acontzu de sa capella monumentale.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.