Sa provìntzia de Aristanis intre sos territòrios prus virtuosos in contu de gestione de sos refudos 

Novas Aristanesas, martis 14 de abrile de su 2026

In su 2024 sa Sardigna cunfirmat livellos artos in sa gestione de sos refudos urbanos ma est sa provìntzia de Aristanis a si distìnghere comente unu de sos territòrios prus virtuosos de s’Ìsula. Lu narat su de 26 Raportos Arpas, fatu cun Osservatòrios provintziales e Regione, basadu subra datos cunfirmados intre Comunes e impiantos. Sa produtzione regionale imbatet a 731 mìgia tonnelladas, in aumentu (+1,3%) mancari siat minimada sa gente, mentres sa regorta diferentziada est a su 76,48%, mantenende s’Ìsula a su de 3 postos in Itàlia.

Sa provìntzia de Aristanis est in testa cun su 80,73% de diferentziada, segunda a Nùgoro ebbia. Su cabu-logu sùperat su 80% e si distinghet pro sa calidade de sa regorta de paperi e orgànicu.

Intre sos comunes ispicat Sèdilo, a canta a su 90%, a pustis Mòguru (84,29%) e Crabas (78,97%) cun pertzentuales artas fintzas in cuntestos difìtziles. Positivos fintzas sos datos in contu de sa calidade de sos refudos orgànicos: sa provìntzia de Aristanis est in sa “fàscia de etzellèntzia”, cun una presèntzia de fratzione non cumpostàbile prus bassa de su 2,5%, e in prus in contu de sa gestione de sos ingombrantes, chi non si elìminant diretamente.

In sa geografia de su recùperu de sa provìntzia de Aristanis ispicant sos comunes de Gonnostramatza, Masuddas, Pompu, Sìmaba e Siris chi si atestant a su 84,29%. Resurtados bonos fintzas dae s’hinterland cun Prammas, Santa Jiusta e Siamajore cun una mèdia de su 83,82%.

Livellos artos (77-78%) fintzas Milis, Nughedu e sos comunes de Santu Lussurzu, Iscanu, Sèneghe e Tramatza, mentres Narabuìa est unu pagu prus a fundu (76,56%).

Non mancant sas crititzidades: s’aumentu de sos refudos intzidit in sas ispesas, mancari in sa provìntzia de Aristanis s’aumentu est pagu. De importu sunt sos eco-tzentros e sa gestione assotziada. In generale su territòriu si cunfirmat unu modellu, sena comunes a suta de sos lìmites de lege e cun resurtados difusos e costantes.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.