Contu a s’imbesse de su tempus chi mancat a s’istiu: traballos, seguresa e servìtzios in sas prajas de sa provìntzia de Aristanis 

Novas Aristanesas, martis 28 de abrile de su 2026

Primas novidades dae sas prajas de sa provìntzia de Aristanis in previsione de s’istiu, intre interventos de pulitzia, organizatzione de sos servìtzios e primos traballos in sas costeras.

In Aristanis sunt istados afidados apaltos pro prus de 200 mìgia èuros destinados a sa gestione de su birde urbanu e a sa manutentzione de sos logos abbandonados. Sos traballos pertocant siat su cabu logu e siat sas fratziones e puntant a garantire su decoro e su rispetu de sas règulas anti-incèndiu in intro de sos primos de làmpadas. Operatziones de fundamentu fintzas pro sas zonas de mare, in ue s’aumentu de sas presèntzias rechedet prus cura e seguresa.

Pro su chi pertocat sa balneatzione, sa marina de Turre Manna s’aprontat cun su pianu de sarvamentu: prevididas tres postatziones cun ses bagninos in totu, ativas pro prus de duos meses in sos puntos prus frecuentados de sa praja. Su servìtziu at a èssere afidadu tràmite gara e at a pòdere èssere afortigadu dae s’agiudu de sos cuntzessionàrios privados.

Interventos fintzas in sa marina de Abarossa, in territòriu de Santa Justa, in ue sunt istadas sistemadas sas intradas a mare e s’istrada chi andat a Buca ‘e Frùmini, cun s’acontzu de su fundu e de sos tretos prus male cumbinados. Pro s’istiu si preparat fintzas sa bidda: in fatis ant comintzadu a nde segare s’erba peri sas istradas e in sos logos pùbblicos, cumpresos Cirras e Corte Bacas.

In su mentres sa Provìntzia pensat de rinviare unos cantos traballos istradales istratègicos, comente cussos in su Ponte de su Remèdiu, pro non creare disàgios in su tempus in ue b’at turistas meda, agrupende imbetzes in custu tempus sos interventos in contu de su birde.

In sos àteros logos de mare comente in su Sinis e in sa marina de Santeru si traballat pro organizare sos servìtzios de istiu, cun seletziones de personale pro parchègios e pulitzia.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.