Una coa de chida de eventos in provìntzia de Aristanis

NOVAS ARISTANESAS, chenàbura 20 de martzu de su 2026

Eventos meda in sa coa de chida in provìntzia de Aristanis. In territòriu de Arborea si podet visitare s’idròvora de Sassu, ùnicu monumentu abertu a sas vìsitas cras e domìniga in zona de Aristanis, pro sas Dies FAI de Beranu.

Dae su pellegrinàgiu a sa festa finale in su Palatzeddu de Sa Rodia: domìniga in Aristanis b’est sa Die Regionale de sos Giòvanos de sa Cunferèntzia Episcopale Sarda, fata gràtzias a su Servìtziu Regionale pro sa Pastorale Giovanile.

Semper domìniga sero in s’auditòrium de Santu Domìnigu b’est sa presentada de “Il sarto di Parigi. Vita e opere di Valentino, Alberto, Daniele, Vendelino Casu, conosciuto come Vandalino” de Mario Luigi Piredda Pilo. E a pustis ancora, pro sa rassigna de Cedac, in su Teatru Garau si rapresentat “La Morte ovvero Il pranzo della domenica”.

Pro cras a merie sa Lega Navale Italiana Sinis – Golfo di Oristano at aprontadu sa “Veleggiata di Primavera” in su Golfu de Aristanis. Ancora isport: semper cras, in su Tzentru “Tino Carta” de Sa Rodia bator iscuadras s’ant a isfidare pro intrare in sa fase inter-regionale pro sa finale de sa festa regionale de su torneu Under 13 Fair Play Élite.

Sighit su biàgiu pro presentare su libru de Davide Piras, “Femmenella”: cras sero at a èssere in su teatru comunale de Terraba.

Chimbe artistas, unu chirurgu de fama internatzionale e su Murats de Samugheo aunidos pro “Via Crucis. La speranza oltre il calvario”, progetu pro fàghere a connòschere s’endometriosi aprontadu pro domìniga a merie.

Semper in custa coa de chida, in su seminàriu pontifìtziu betzu de Cùglieri s’aberit sa mustra chi faeddat de sos ritos de Chida Santa.

Si serrat su progetu “Carnevale nel Guilcier – Letture in Maschera”, custu sero e cras sero in sas bibliotecas comunales de Norghiddo e de Bilartzi cun Mara Damiani.

In ùrtimu, in sa libreria “Chiara e Stefy” de Bachisio Medde in Bilartzi, cras sero est òspite Giovanni Follesa cun su libru “Un Ferragosto”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.