Una coa de chida de apuntamentos in provìntzia de Aristanis

Novas Aristanesas, chenàbura 6 de martzu de su 2026

Una coa de chida de apuntamentos in provìntzia de Aristanis – Eventos meda in sa coa de chida in provìntzia de Aristanis.

In Narabuìa torrat sa de 23 Sagras de sa Tzìpula, un’editzione ispetziale chi ponet paris gustu e istòria e festat sa figura feminile; inoghe sas Zipuas a Bentu sunt sas protagonistas. Domìniga b’at in programma assàgios de màndigos, ammentos istòricos, mùsica e bìsitas a sos nuraghes Aresti e Lizzos.

Ària de carrasegare cras in Ardaule cun sa traditzione e s’incantu de Su Carrasegare Antigu imbetzes oe in Sèneghe s’ùrtimu apuntamentu in sa Domo Aragonesa cun sas Dies de progetatzione partetzipada.

In Aristanis, custu mangianu in su litzeu clàssicu De Castro b’est sa lectio magistralis de Giuseppe Lumia e custu sero in su Museu Diotzesanu s’ùrtimu apuntamentu de “I Pomeriggi del Romanico 2026”. Cras mangianu unu tributu a Pino Spiga cun sa dedicatzione de su parcu isportivu de Toràngius e domìniga sero in su monastèriu de Santa Chiara sa cunferèntzia cuntzertu “Musica è Donna” e s’abertura de sa mustra “Vegliate” de Silvia Idili in su Museu Diotzesanu. Semper domìniga, sa piscina de su Comune òspitat su campionadu regionale de nàdidu paralìmpicu.

Custu sero in Tzeddiani, in sos locales de su Monte Granàticu b’est “Non 1 ma 365 – Aspettando l’8 Marzo” cun leturas e contos a incuru de sos grupos “Intrecci”, “Ragazzi in Bidda” e “Babbaua”.

In Crabas tres propostas intre biblioteca e iscola. A pustis de sa presentatzione de “Imperfetto femminile” de eris, custu sero tocat a “Madri” de Lorenzo Braina e cras pro totu sos istudiantes, òmines e fèminas, sa de tres editziones de “Non sono una principessa”.

Santeru ammentat a Gràssia Deledda: cras sero in biblioteca b’at a àere cunsideros, filmados e unu cuntzertu.

Dae cras, comintzat “Scenari Teatrali 2026”, sa rassigna de Artisti Fuori Posto cun Sardinia Maskaras in su teatru comunale de Terraba,

In ùrtimu, domìniga mangianu in Marrùbiu torrat su cross country e sa de 13 editziones de su Trofeu S.M. Zuràdili.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.