Su tempus malu at arruinadu sa provìntzia de Aristanis

Novas Aristanesas, martis 3 de martzu de su 2026

Su tempus malu at arruinadu sa provìntzia de Aristanis – Su tempus malu e su tziclone Harry at arruinadu comunes meda de sa provìntzia de Aristanis, e meda de custos ant decraradu s’istadu de calamidade naturale. Crabas, ghiada dae su sìndigu Andrea Abis, at ativadu sa protzedura a pustis de tantas chidas de abba meda, bentu forte e maregiadas chi ant arruinadu colturas, infrastruturas in sas costas e in sas praias. Sos logos prus colpidos sunt su litorale de Santu Giuanne, cun dannos istruturales, erosione de sa costa e franas. In Mari Ermi est istadu distrutu su ponte de linna, s’ùnica intrada a sa praia “S’agricoltura est in suferèntzia manna: sas colturas sunt arruinadas e in sos caminos de campagna non faghet a bi passare”, ispiegant dae s’amministratzione.

Situatzione crìtica fintzas in Sabarussa, in ue su sìndigu Mario Tendas denùntziat: “Su setore de s’agricoltura est in suferèntzia manna: sos campos de cartzofa sunt totu allagados e sa cosa est totu guasta. A su matessi tempus arribant sinnalatziones fintzas dae sos produtores de agrumes: in su territòriu nostru b’at prus de chentu ètaros de agrumetos chi ant tentu dannos mannos”. Su primu tzitadinu sinnalat puru unu controllu de sighidu de su frùmene Tirsu. In Arborea, sa sìndiga Manuela Pintus at prorogadu s’istadu de calamidade pro s’abba meda e maregiadas intre ghennàrgiu e freàrgiu. “Sos chi traballant in su setore de s’agricoltura e chi ant tentu dannos in sas aziendas issoro pro neghe de calamidade naturale o de su tempus malu, lu devent sinnalare a su Servìtziu indennizos in agricoltura pro calamidades naturales de s’Agentzia Laore Sardegna”, narat sa delìbera.

Sos comunes de Uras, Paule, Abbasanta e Aristanis ant fatu sa matessi cosa, sinnalende dannos a sas colturas, domos de campagna, istradas e monumentos ma fintzas a privados e aziendas e ant regortu sas sinnalatziones de dannos presentadas dae tzitadinos e aziendas.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.