Sos istudiantes de Aristanis iscoberint su mundu e su territòriu

Novas Aristanesas, martis 10 de martzu de su 2026

Sos istudiantes de Aristanis iscoberint su mundu e su territòriu – Dae sas àulas de Aristanis a Europa e s’iscoberta de su territòriu, sunt meda sas initziativas chi in custas chidas bient comente protagonistas sos istudiantes de su territòriu.

Intre sas esperièntzias oramai afortigadas b’est su stage linguìsticu in su Regnu Unidu de sos istudiantes de s’Istitutu Cumprensivu 3-4. Sos alunnos de sas classes segundas e tertzas ant passadu unu tempus de istùdiu in Eastbourne, istràngios de su residence de sa Twin School, in su programma de “school integration” de sa St Catherine School. Non letziones de limba ebbia, ma una partetzipatzione a sas letziones in iscola onni die, cun sos istudiantes agiuados dae unu “buddy”, unu cumpàngiu chi teniat s’incàrrigu de los ghiare in sas atividades e in sas letziones.

Sos istudiantes de su litzeu artìsticu “De Castro-Contini” imbetzes sunt andados a Bartzellona cun sa Grimaldi Lines pro sa “Nave della Biennale”, su progetu de punta de ViaggiArte, sa Biennale natzionale de sos litzeos artìsticos. Sos istudiantes ant partetzipadu a laboratòrios, atividades creativas e percursos de startup education, mudende ideas artìsticas in progetos imprenditoriales.

E ancora, una delegatzione de su litzeu “Benedetto Croce” at partetzipadu a sa tzerimònia italiana de su Prix Goncourt des Lycéens in s’Ambasciada de Frantza in Roma. Imbàtida a sa de 13 editziones italianas, s’initziativa est promòvida dae s’ambasciada frantzesa e dae s’Institut français Italia (IFI) cun s’Académie Goncourt.

Logu puru a su territòriu: cun su progetu “Qui vivo, qui racconto” de sa Fundatzione Mont’e Prama, sos istudiantes de s’Istitutu cumprensivu de Crabas e Arriora ant a èssere custodes ativos de su patrimòniu archeològicu locale. Cun una filera de letziones frontales, laboratòrios didàticos e bìsitas operativas, ant a comintzare unu percursu de formatzione ispetzialìstica e su 17 e 18 de abrile, pro s’eventu finale, ant a fàghere de ghias a sos bisitadores de sos sitos archeològicos gestidos dae sa Fundatzione.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.